ខេត្តមណ្ឌលគិរី ៖ ចៅក្រមស៊ើបសួរសាលាដំបូងខេត្តមណ្ឌលគិរី បានសម្រេចចេញដីកាឃុំខ្លួន បុរសព្រានព្រៃម្នាក់ ដាក់ពន្ធនាគារបណ្ដោះអាសន្ន ចោទពីបទដាក់អន្ទាក់សត្វ ដោយប្រើបង្កៃ ដើម្បីចាប់សត្វព្រៃកម្រជាច្រើនប្រភេទដោយខុសច្បាប់។
ជនត្រូវចោទខាងលើនេះ ត្រូវបានតុលាការខេត្តមណ្ឌលគិរី ចេញដីកាឃុំខ្លួន កាលពីរសៀលថ្ងៃទី២៨ ខែមករា ឆ្នាំ២០២០នេះ។
សាលាដំបូងខេត្តមណ្ឌលគិរី បានចោទបុរសព្រានព្រៃខាងលើថា បានធ្វើសកម្មភាពបង្កឲ្យមានការស្លាប់ដល់សត្វព្រៃ ដែលជាប្រភេទសត្វព្រៃកម្រជិតផុតពូជនៅក្នុងប្រទេសកម្ពុជា។ ហើយថា វាជាបទល្មើសធនធានធម្មជាតិថ្នាក់ទី៣ ប្រព្រឹត្តនៅក្នុងតំបន់ការពារធម្មជាតិ នៃដែនជម្រកសត្វព្រៃស្រែពក ខេត្រមណ្ឌលគិរី។
សូមបញ្ជាក់ថា ជនត្រូវចោទឈ្មោះ ហក វ៉ាន់ ភេទប្រុស អាយុ១៩ឆ្នាំ រស់នៅភូមិកោះម្យើល ឃុំណងឃីលឹក ស្រុកកោះញ៉ែក ខេត្តមណ្ឌលគិរី ត្រូវបានមន្ត្រីឧទ្យានុរក្សដែនជម្រកសត្វព្រៃស្រែពក ចាប់ឃាត់ខ្លួនភ្លាមៗ បន្ទាប់ពីជនសង្ស័យរូបនេះ បានលួចធ្វើសកម្មភាពដាក់អន្ទាក់សត្វព្រៃ ដែលប្រើឧបករណ៍កែច្នៃ ដោយប្រើអង្គប់ បំពុល សម្លាប់ ប្រើប្រាស់អាវុធជាតិផ្ទុះ ជាតិគីមី ថ្នាំពុល គ្រឿងឆក់ បង្កគ្រោះថ្នាក់ដល់សត្វព្រៃ និងអាចបង្កគ្រោះថ្នាក់ដល់មន្ត្រីឧទ្យានុរក្ស ក្នុងពេលចុះល្បាតព្រៃជាដើម។
ចំពោះវត្ថុតាងជាក់ស្ដែង នៃបទល្មើសធនធានធម្មជាតិ ដែលត្រូវមន្ត្រីឧទ្យានុរក្សដកហូតបានរួមមាន៖
១- រំសេវផ្ទុះចំនួន ០.៥គីឡូក្រាម
២- លួសឆក់ចំនួន០៣ដុំ
៣- អង្គប់រស័រ នាំចូលពីប្រទេសវៀតណាមចំនួន០៣
៤- អន្ទាក់ខ្សែកាបចំនួន០៥ខ្សែ
៥- អន្ទាក់ខ្សែគោចំនួន៦៥ខ្សែ
៦- ឧបករណ៍ឆក់ចំនួនមួយកំប្លេ
៧- ផ្ទាំងសូឡាចំនួន០១ផ្ទាំង
៨- មងទាក់សត្វសំពោចចំនួន ០១ដុំ
៩- អន្ទាក់ដែលដាក់ហើយ ចំនួន១០០ខ្សែ
បច្ចុប្បន្នវត្ថុតាងមួយចំនួន ត្រូវបាននាំយកមករក្សាទុកបណ្ដោះអាសន្ននៅមន្ទីរបរិស្ថានខេត្តមណ្ឌលគិរី និងមួយចំនួនទៀត មន្ត្រីឧទ្យានុរក្ស កំពុងប្រមូល និងសា រួចបំផ្លាញចោលនៅកន្លែងកើតហេតុ ព្រោះអាចបង្កគ្រោះថ្នាក់ដល់អាយុជីវិតប្រភេទសត្វព្រៃ និងមនុស្សថែមទៀតផង៕ ដោយ៖ ដែន សីមា