គណៈកម្មាការសុខភាពជាតិរបស់ចិន បានប្រកាសនៅថ្ងៃពុធនេះថា ចំនួនអ្នកស្លាប់ដោយសារការផ្ទុះវីរុសកូរ៉ូណាក្នុងប្រទេសបានកើនឡើងដល់ ១៣២នាក់ និងមានអ្នកឆ្លងជំងឺមរណៈនេះថ្មីចំនួន ១.៤៥៩ករណី។
អាជ្ញាធរបញ្ជាក់ថា រហូតមកដល់ពេលនេះ ចំនួនអ្នកឆ្លងវីរុសកូរ៉ូណាក្នុងប្រទេសចិនមាន ៥.៩៧៤ករណី។
គណៈកម្មការខាងលើបាននិយាយថា ពួកគេក៏កំពុងពិនិត្យមើលករណីសង្ស័យជាង ៩.០០០ករណីទៀត។ ការរីករាលដាលយ៉ាងលឿនរបស់វីរុសដ៏អាថ៌កំបាំងនេះ កើតឡើង ខណៈពេលដែលទីក្រុងប៉េកាំងបានបញ្ជាក់ពីទំនុកចិត្ត ក្នុងការគ្រប់គ្រងវីរុសដ៏សាហាវនោះ។
វីរុសដែលមានអាការៈដូចជាផ្តាសាយនេះ បាករីករាលដាលយ៉ាងលឿនទៅកាន់ប្រទេសជាច្រើនជុំវិញពិភពលោក ប៉ុន្តែក្នុងចំណោមប្រទេសទាំងនោះ មិនទាន់មានករណីស្លាប់នៅឡើយទេ។
សូមបញ្ជាក់ថា វីរុសដ៏អាថ៌កំបាំង និងកាចសាហាវនេះ បានផ្ទុះឡើងដំបូងនៅក្នុងទីក្រុងវូហាន (Wuhan) នៃខេត្ត ហូប៉ី (Hubei)៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia