ប្រជាជនជប៉ុនដំបូងដែលត្រូវបានរដ្ឋាភិបាល ធ្វើការជម្លៀសចេញពីទីក្រុងវូហាន កន្លែងដែលវីរុសកូរ៉ូណាផ្ទុះ បានមកដល់ទីក្រុងតូក្យូហើយ នៅព្រឹកថ្ងៃពុធនេះ។
យន្តហោះបានធ្វើដំណើរមកដល់ព្រលាន Haneda នៅម៉ោង ៨ និង ៤៥នាទី ហើយមន្រ្តីជប៉ុននិយាយថា យន្តហោះមានអ្នកដំណើរទាំងអស់ចំនួន ២០៦នាក់។
មិនមែនតែជប៉ុនទេដែលបានជម្លៀសប្រជាជនរបស់ខ្លួន តែមានប្រទេសជាច្រើនទៀត ដែលបានយកប្រជាជនខ្លួនចេញពីតំបន់ផ្ទុះវីរុសមរណៈដូចជាអាមេរិចជាដើម។
យន្តហោះរបស់ជប៉ុនបានធ្វើដំណើរដល់ទីក្រុងវូហាននៅពេលយប់ និងបាននាំយកទៅជាមួយនូវម៉ាសចំនួន ១៥.០០០ ស្រោមដៃ ៥០.០០០គូ និងវ៉ែនតាការពារចំនួន ៨.០០០។ នេះបើតាមការបញ្ជាក់របស់ក្រសួងការបរទេសជប៉ុន។
មន្រ្តីសុខាភិបាលចំនួន ៤នាក់ ក៏បានធ្វើដំណើរតាមយន្តហោះដើម្បីត្រួតពិនិត្យអ្នកដំណើរជប៉ុនដែលត្រឡប់មកវិញ។
អ្នកដំណើរជប៉ុនទាំងអស់ដែលទើបនឹងត្រឡប់មកវិញ នឹងត្រូវគេធ្វើតេស្តដើម្បីពិនិត្យមើលសញ្ញានៃវីរុសកូរ៉ូណា ដែលបានផ្តាច់ជីវិតមនុស្សចំនួន ១៣២នាក់ហើយរហូតមកដល់ពេលនេះ។
ប្រជាជនជប៉ុនដែលទើបនឹងត្រូវគេដឹកត្រឡប់មកពីចិនវិញ នឹងត្រូវគេសុំឲ្យស្នាក់នៅផ្ទះ និងមិនឲ្យជួបជុំហ្វូងមនុស្ស រហូតដល់លទ្ធផលនៃការធ្វើតេស្តរបស់ពួកគេបានដឹង៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
