អាមេរិច បាននិយាយនៅថ្ងៃអង្គារថា ខ្លួនកំពុងតែអភិវឌ្ឍន៍វ៉ាក់សាំងប្រឆាំងនឹងវីរុសមរណៈ ដែលបានផ្ទុះនៅក្នុងប្រទេសចិន និងបានជំរុញឲ្យទីក្រុងប៉េកាំង បង្កើនកិច្ចសហប្រតិបត្តិការជាមួយនឹងអាជ្ញាធរសុខភាពអន្តរជាតិ។
មន្រ្តីសុខាភិបាលអាមេរិចឈ្មោះ Anthony Fauci បានថ្លែងប្រាប់អ្នកសារព័ត៌មានថា “ពួកយើងបានចាប់ផ្តើមវាហើយនៅវិទ្យាស្ថានសុខាភិបាលជាតិ ជាមួយអ្នកសហការជាច្រើន ដើម្បីអភិវឌ្ឍន៍វ៉ាក់សាំង”។
ដំណើរការនឹងត្រូវការរយៈពេល ៣ខែដើម្បីចាប់ផ្តើមការសាកល្បងលើកដំបូង និង ៣ខែទៀតដើម្បីប្រមូលទិន្នន័យ មុនពេលអាចចាប់ផ្តើមដំណាក់កាលទី ២បាន។
សូមបញ្ជាក់ថា វីរុសមរណៈកូរ៉ូណា ដែលបានផ្ទុះចេញពីទីក្រុងវូហាន ប្រទេសចិន បានសម្លាប់ជីវិតមនុស្សចំនួន ១៣២នាក់ និងឆ្លងជិត ៦.០០០ករណីរហូតមកដល់ពេលនេះ។
ចិនបានបង្ហាញទំនុចិត្តរបស់ខ្លួនថា ខ្លួនអាចគ្រប់គ្រង និងយកឈ្នះលើវីរុសដ៏កាចសាហាវនេះបាន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
