ក្រុមហ៊ុនកាហ្វេរបស់អាមេរិច Starbucks បានធ្វើការបិទសាខារបស់ខ្លួនជាងពាក់កណ្តាលនៅចិន ដើម្បីការពារបុគ្គលិករបស់ខ្លួន និងគាំទ្រដល់រដ្ឋាភិបាលចិនក្នុងការទប់ស្កាត់វីរុសមរណៈ កូរ៉ូណា (Coronavirus)។
ក្រុមហ៊ុនកាហ្វេដ៏ល្បីខាងលើបានព្រមានថា ការរីករាលដាលនៃវីរុសយ៉ាងលឿន ទំនងជាប៉ះពាល់ដល់ហិរញ្ញវត្ថុរបស់ខ្លួន។
Starbucks មានសាខាទាំងអស់ជិត ៤.៣០០កន្លែងនៅក្នុងប្រទេសចិន ដែលជាទីផ្សារធំបំផុតទី ២របស់ក្រុមហ៊ុន បន្ទាប់ពីនៅអាមេរិច។
ក្រុមហ៊ុនខាងលើបានបើកហាងដំបូងរបស់ខ្លួននៅទីក្រុងប៉េកាំង ក្នុងឆ្នាំ ១៩៩៩។ ទីផ្សារនៅចិនស្មើនឹង ១០ភាគរយនៃចំណូលសរុបដែលក្រុមហ៊ុនរកបានទូទាំងពិភពលោក។
សូមបញ្ជាក់ថា រហូតមកដល់ថ្ងៃពុធនេះ តួលេខអ្នកស្លាប់ដោយសារតែវីរុសដ៏កាចសាហាវនោះ បានកើនឡើងដល់ ១៣២នាក់ និងមានជិត ៦.០០០នាក់បានឆ្លងវីរុសនោះ ដែលមានការផ្ទុះឡើងដំបូងនៅទីក្រុងវូហាន ប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
