ភ្នំពេញ៖ លោក ប្រធានមន្ទីរសុខាភិបាលរាជធានីភ្នំពេញ បានបញ្ជាក់ថា ៖
រហូតមកដល់ពេលនេះ ពុំទាន់រកឃើញករណីជំងឺរលាកផ្លូវដង្ហើមប្រភេទថ្មីកូរ៉ូណា (Coronavirus) នៅក្នុងមន្ទីរពេទ្យរុស្ស៊ី ក៏ដូចជានៅទូទាំងរាជធានីភ្នំពេញ ដូចពាក្យចចាមអារ៉ាមតាមបណ្តាញសង្គមហ្វេសប៊ុក
នោះឡើយ។
លោកងី មានហេង ប្រធានមន្ទីរសុខាភិបាលរាជធានីភ្នំពេញ បានបញ្ជាក់បែបនេះ នៅក្នុងសន្និសីទសាព័ត៌មាន នៅមន្ទីរពេទ្យរុស្ស៊ី កាលពីថ្ងៃ២៩ មករា ឆ្នាំ២០២០ ។
លោកបានបញ្ជាក់ថា៖ ការផ្សព្វផ្សាយព័ត៌មានមិនពិត ហើយបំភ្លៃអំពីជំងឺរលាកផ្លូវ ដង្ហើមប្រភេទថ្មីនេះ គឺជាចេតនាបំពុលសង្គម ហើយបង្កឱ្យមានការភាន់ច្រឡំដល់ពលរដ្ឋកាន់តែខ្លាំងឡើង។
ក្នុងឱកាសនោះដែរ លោក ងី មានហេង ក៏បានស្នើសុំឲ្យអ្នកកាសែតឈ្មោះ ខេសូនមួយត្រូវសុំទោស ជាសាធារណៈឡើងវិញ ដោយកន្លងទៅខ្លួនបានផ្សព្វផ្សាយព័ត៌មាន
មិនពិត ចំពោះរឿងនេះ ដូច្នេះលោកត្រូវផ្សាយបំភ្លឺសាធារណជន ឡើងវិញ និងសុំ ទោសជាសាធារណៈ ចំពោះ បងប្អូនប្រជាពលរដ្ឋ ដែលលោកកំពុងតាមដាន នូវសភាពការណ៍ជំងឺថ្មីបែបនេះ ដោយយកចិត្ដទុកដាក់បំផុតនោះផងដែរ ។
លោកងី ម៉េង ប្រធានមន្ទីរពេទ្យរុស្ស៊ី បានបញ្ជាក់ថា ពាក់ព័ន្ធនឹងការចែកចាយដំណឹងមិនពិតនេះ អំពីជំងឺរលាកផ្លូវដង្ហើមប្រភេទថ្មីនេះ រដ្ឋមន្រ្តីក្រសួងសុខាភិបាល លោក ម៉ម ប៊ុនហេង ក៏បានច្រានចោលនូវការចុះផ្សព្វផ្សាយថា មានករណីជំងឺផ្លូវដង្ហើមថ្មី២ករណី នៅលើខ្លួនជនជាតិចិន២នាក់ ក្នុងទឹកដីខេត្តកោះកុងផងដែរ។
ប្រធានមន្ទីរពេទ្យរុស្ស៊ី បានបញ្ជាក់ថា មន្ទីរពេទ្យរុស្ស៊ីរហូតមកដល់ពេលនេះ មិនមានករណីជំងឺរលាកផ្លូវដង្ហើមថ្មីកូរ៉ូណា នោះទេ។ មេរោគនេះ ត្រូវបាន រកឃើញនៅលើខ្លួនជនជាតិចិនម្នាក់ អាយុ ៦០ឆ្នាំ ដែលធ្វើដំណើរពីក្រុងវូហាន ខេត្តហួប៉ី ប្រទេសចិន ចូលមកដល់ខេត្តព្រះសីហនុ នៅថ្ងៃទី២៣ ខែមករា ឆ្នាំ២០២០។ ជនជាតិចិនរូបនោះ មកជាមួយក្រុមគ្រួសារ ៣នាក់ទៀត ប៉ុន្តែក្រុមគ្រួសាររបស់គាត់ រហូតមកដល់ពេលនេះ ពុំទាន់រកឃើញថាបានឆ្លងជំងឺកាចសាហាវនេះឡើយ។ ពាក់ព័ន្ធនឹង ស្ថានភាពជំងឺជនជាតិចិនខាងលើនេះវិញ លោកងី ម៉េង បានលើកឡើងថា រហូតមកទល់ពេលនេះ ស្ថានភាពជំងឺពុំមានលក្ខណៈធ្ងន់ធ្ងរឡើយ ហើយកំពុងវិលទៅរកភាពប្រសើរឡើង៕ ដោយ៖ កូឡាប