ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀងនាព្រឹកថ្ងៃទី២៩ ខែមករា ឆ្នាំ២០២០នេះ នៅសាលប្រជុំ VIP សាលាខេត្ត បានអនុញ្ញាតឲ្យតំណាងក្រុមហ៊ុនជប៉ុន មីនេបៀមីតស្ស៊ុមិផ្គត់ផ្គង់ភ្លើងបំភ្លឺផ្លូវឆ្លាតវ៉ៃប្រភេទ LED និងសហការី ចូលជួបសម្ដែងការគួរសម និងពិភាក្សាការងារសំខាន់ៗមួយចំនួន ពាក់ព័ន្ធនឹងគម្រោងបំពាក់ភ្លើងបំភ្លឺផ្លូវសាធារណៈ ដោយប្រព័ន្ធបច្ចេកវិទ្យាឆ្លាតវៃ។
ក្នុងឱកាសនោះ តំណាងក្រុមហ៊ុន បានសម្ដែងនូវការអរគុណចំពោះលោកអភិបាលខេត្ត ដែលបានអនុញ្ញាតឲ្យលោក និងសហការី ចូលជួបសម្ដែងការគួរសម ព្រមទាំងបានជម្រាបជូនពីគម្រោងដែលក្រុមហ៊ុន គ្រោងនឹងធ្វើការវិនិយោគលើវិស័យផ្គត់ផ្គង់ភ្លើងបំភ្លឺផ្លូវសាធារណៈឆ្លាតវៃនៅលើទឹកដី ខេត្តស្វាយរៀង។
មានប្រសាសន៍ក្នុងជំនួបនេះ លោកអភិបាលខេត្ត បានជម្រាបជូនអំពីស្ថានភាពទូទៅ និងសក្ដានុពលសំខាន់ៗរបស់ខេត្តស្វាយរៀង ព្រមទាំងបានសម្ដែងនូវការអរគុណ ចំពោះក្រុមហ៊ុនជប៉ុនដែលមានបំណង ធ្វើការវិនិយោគភ្លើងបំភ្លឺផ្លូវសាធារណៈ ក្នុងខេត្តស្វាយរៀងនៅពេលនេះ ដែលចូលរួមចំណែកកាត់បន្ថយ ទៅលើការចំណាយថាមពលអគ្គិសនី និងឧស្ម័នកាបូនិច ជាពិសេសចូលរួមចំណែកលើការកម្ពស់សោភ័ណភាព នៅក្នុងខេត្តស្របទៅតាមសម័យកាលបច្ចុប្បន្ន។
ទន្ទឹមនេះ លោកអភិបាលខេត្តបានបញ្ជាក់ថា ក្នុងនាមរដ្ឋបាលខេត្តស្វាយរៀង សូមគាំទ្រនឹងសហការផ្តល់ឱកាសឲ្យក្រុមហ៊ុនសិក្សាទៅលើតាំងភូមិសាស្ត្រ ក្នុងក្រុងស្វាយរៀង និងក្រុងបាវិតដើម្បីផ្លាស់ប្តូរ និងបំពាក់ភ្លើងបំភ្លឺផ្លូវឆ្លាតវៃនាពេលខាងមុខនេះ៕ដោយ៖វ៉ៃកូ