តួលេខនៃអ្នកស្លាប់ដោយសារវីរុសមរណៈកូរ៉ូណា (Coronavirus) បានកើនឡើងដល់ចំនួន ១៧០នាក់ ខណៈដែលមានការឆ្លងថ្មីចំនួន ១.៧០០ករណី។ នេះបើតាមការបញ្ជាក់របស់រដ្ឋាភិបាលចិន នៅថ្ងៃព្រហស្បតិ៍នេះ។
ត្រឹមតែរយៈពេល ១ថ្ងៃ មានអ្នកស្លាប់ដោយសារវីរុសដ៏សាហាវនេះចំនួន ៣៨នាក់ ដោយកើនឡើងពី ១៣២នាក់កាលពីថ្ងៃពុធ។
ក្នុងចំណោមអ្នកស្លាប់ ៣៨នាក់ មាន ៣៧នាក់កើតឡើងនៅខេត្ត ហូប៉ី ដែលជាតំបន់ដែលរងការវាយប្រហារ ដោយវីរុសដ៏អាថ៌កំបាំងនោះខ្លាំងជាងគេ។
ខ្ពង់រាបទីបេ មានករណីឆ្លងវីរុសនេះជាលើកដំបូង។
រហូតមកដល់ពេលនេះ មានការឆ្លងវីរុសនេះទូទាំងពិភពលោកសរុបចំនួន ៧.៨០៦ករណី។
សូមបញ្ជាក់ថា វីរុសដែលមានអាការៈដូចជាផ្តាសាយនេះ បានរីករាលដាលយ៉ាងលឿន ទៅកាន់ប្រទេសជាច្រើនជុំវិញពិភពលោក ប៉ុន្តែក្នុងចំណោមប្រទេសទាំងនោះ មិនទាន់មានករណីស្លាប់នៅឡើយទេ។
វាផ្ទុះឡើងដំបូងនៅក្នុងទីក្រុងវូហាន (Wuhan) នៃខេត្ត ហូប៉ី (Hubei)៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
