កោះកុង ៖ នគរបាលព្រហ្មទណ្ឌនៃស្នងការដ្ឋាននគរបាលខេត្តកោះកុង នាព្រឹកថ្ងៃទី៣០ ខែមករា ឆ្នាំ២០២០នេះ បានបង្ហាញមុខសញ្ញាចោរលួចដ៏សកម្មចំនួន៩នាក់ ដែលកន្លងមកពួកគេ បានធ្វើសកម្មភាពលួចម៉ូតូជាបន្តបន្ទាប់ នៅក្នុងក្រុងខេមរភូមិន្ទ ស្រុកមណ្ឌលសីមា និងស្រុកបុទុមសាគរ នៃខេត្តកោះកុង ។
លោក ឃឹម សាណេ ស្នងការរង និងជាប្រធានផែនការងារនគរបាលព្រហ្មទណ្ឌ នៃស្នងការដ្ឋាននគរបាលខេត្តកោះកុង បានបញ្ជាក់ថា មុខសញ្ញាទាំង៩នាក់ដែលសមត្ថកិច្ចបង្ហាញមុខនាពេលនេះ គឺសុទ្ធតែជាមុខសញ្ញាជួញដូរគ្រឿងញៀន និងលួចយ៉ាងសកម្មនៅក្នុងក្រុងខេមរភូមិន្ទ ដែលកម្លាំងយើងបានធ្វើការតាមដាននិងឃាត់ខ្លួនបាន កាលពីយប់ថ្ងៃទី២៩ ខែមករា ឆ្នាំ២០២០ ហើយក្នុងនោះក៏មានមុខសញ្ញាដែលបានប្រព្រឹត្តបទល្មើសលួច និងជួញដូរគ្រឿងញៀនចំនួន២នាក់ ដែលទើបតែបានដោះលែងចេញពន្ធនាគារ នាពេលថ្មីៗនេះផងដែរ ហើយពួកគេបានធ្វើសកម្មភាពលួចម៉ូតូចំនួន៨លើករួចហើយ ដោយក្នុងនោះមាន៤លើក នៅក្នុងក្រុងខេមរភូមិន្ទ នៅក្នុងស្រុកមណ្ឌលសីមាចំនួន៣លើក និងនៅក្នុងស្រុកបុទុមសាគរចំនួន១លើក ហើយម៉ូតូដែលពួកគេបានលួចនោះ ភាគច្រើនត្រូវបានប្តូរពណ៌ និងកែលម្អតាមបែបផ្សេងៗ ទៅតាមអ្វីដែលពួកគេអាចធ្វើបាន ដើម្បីបន្លំភ្នែកលក់ឲ្យអ្នកដទៃ។
លោក បានបន្តថា មុខសញ្ញាដែលសមត្ថកិច្ចយើងបង្ហាញមុខនាពេលនេះ គឺទី១ មានឈ្មោះ ហាក់ រ៉ូនី ភេទប្រុស អាយុ២៥ឆ្នាំ ជនជាតិឥស្លាម មានមុខរបរមិនពិតប្រាកដ ស្នាក់នៅភូមិ៤ សង្កាត់ដងទង់ ក្រុងខេមរភូមិន្ទ (ជាមេខ្លោ ងក្នុងអំពើលួចម៉ូតូយ៉ាងសកម្ម) ទី២ ឈ្មោះ កែវ មុន្នីរ័ត្ន ហៅសល់ ភេទប្រុស អាយុ១៨ឆ្នាំ មានមុខរបរមិនពិតប្រាកដ បច្ចុប្បន្នស្នាក់នៅផ្ទះជួល ក្នុងភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ទី៣ ឈ្មោះ វ៉ា ធារ៉ា ភេទប្រុស អាយុ២៩ឆ្នាំ ជាអ្នកបើកបររថយន្ត មានទីលំនៅភូមិ២ ឃុំប៉ាក់ខ្លង ស្រុកមណ្ឌលសីមា ទី៤ ប៊ុត រតនា ភេទប្រុស អាយុ១៧ឆ្នាំ មុខរបរមិពិតប្រាកដ មានទីលំនៅភូមិចម្លងគោ ឃុំថ្មស ស្រុកបុទុមសាគរ ទី៥ ឈ្មោះ សួង ឆៃហូ ភេទប្រុស អាយុ២២ឆ្នាំ មុខបរមិនពិតប្រាកដ រស់នៅភូមិ២ សង្កាត់ដងទង់ ក្រុងខេមរភូមិន្ទ ទី៦ ឈ្មោះ តាន់ ចិត្រា ភេទប្រុស អាយុ២៣ឆ្នាំ មុខរបរជាងដែក ស្នាក់នៅផ្ទះជួលភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ទី៧ ឈ្មោះ ឆាន រស្មី ភេទប្រុស អាយុ៣០ឆ្នាំ មានមុខរបរជាងសំណង់ ស្នាក់នៅផ្ទះជួលភូមិ១ សង្កាត់ស្មាច់មានជ័យ ក្រុងខេមរភូមិន្ទ ទី៨ ឈ្មោះ គឹម កី ភេទប្រុស អាយុ២២ឆ្នាំ មានមុខរបរជាងចាក់សាក់ មានទីលំនៅឃុំជីផាត ស្រុកថ្មបាំង និងទី៩ ឈ្មោះ គឹម ហុង ភេទប្រុស អាយុ៣៩ឆ្នាំ មុខរបរកម្មករ មានទីលំនៅភូមិ២ ឃុំប៉ាក់ខ្លង ស្រុកមណ្ឌលសីមា (ជាអ្នកទទួលផលចោរកម្ម) ។
កម្លាំងនគរបាលខេត្តកោះកុង ដកហូតបានវត្ថុតាងមួយចំនួនរួមមាន ៖ ម៉ូតូចំនួន៦គ្រឿង មាន HONDA WAVE ចំនួន៣គ្រឿង HONDA ICON ចំនួន១គ្រឿង YAMAHA EXCITER ចំនួន១គ្រឿង និងម៉ាក ឌូក១គ្រឿង រួមទាំងឧបករណ៍សម្រាប់ធ្វើសកម្មភាពកាច់កម៉ូតូ គ្រឿញៀនប្រភេទម្សៅពណ៌សចំនួន៧កញ្ចប់ (ធំ១) និងឩបករណ៍សម្រាប់ប្រើប្រាស់ថ្នាំញៀនមួយចំនួន ដាវសាម៉ូរៃ១ដើម ថ្នាំពណ៌ចំនួន១កំប៉ុង ។
លោក បានឲ្យ ដឹងទៀតថា ជនសង្ស័យដែលសមត្ថកិច្ចឃាត់ខ្លួននាពេលនេះ ត្រូវបញ្ជូនទៅកាន់អយ្យការសាលាដំបូងខេត្តកោះកុង ចាត់ការបន្ត ចំពោះវត្ថុតាងម៉ូតូត្រូវបានរក្សាទុក នៅស្នងការដ្ឋាននគរបាលខេត្តកោះកុង ដើម្បីធ្វើរបាយការណ៍រួចហៅម្ចាស់មកយកទៅប្រើប្រាស់វិញ ។
លោកស្នងការរង បានបន្ថែមថា បើទោះបីជាសមត្ថកិច្ចអាចរក្សាការពារនូវសុវត្ថិភាព សណ្តាប់ធ្នាប់បានយ៉ាងណាក្តី ក៏លោកនៅតែធ្វើការសំណូមពរ ដល់ពលរដ្ឋត្រូវចេះថែរក្សាការពារ នូវទ្រព្យសម្បត្តិរបស់ខ្លួន ដោយកុំមានការធ្វេសប្រហែសពេក ព្រោះវាក៏អាចមានការថ្លោះធ្លោយ នូវប្រការណាមួយជាយថាហេតុដែលយើងមិនស្មានទុកជាមុន ៕ដោយ៖កូឡាប