តាកែវ៖ ថ្លែងក្នុងពិធីប្រកាសមុខតំណែងជានាយកវិទ្យាសា្ថនពហុបច្ចេកទេសភូមិភាគតេជោសែនតាកែវថ្មី នាព្រឹកថ្ងៃទី៣០ ខែមករា ឆ្នាំ២០២០នេះ លោកបណ្ឌិត ពេជ សោភ័ន រដ្ឋលេខាធិការ ប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ដើម្បីឆ្លើយតបទៅនិងទីផ្សារការងារនាពេលអនាគតទៅបាន គ្រូជំនាញត្រូវស្វែងយល់បន្ថែម លើបច្ចេកវិទ្យាទំនើបដែលបរទេសកំពុងតែដើរមុនយើង ដូច្នេះរាល់ការសិក្សាស្វែងយល់បន្ថែមនេះ ត្រូវតែយកចិត្តទុកដាក់ និងសម្រិតសម្រាំង ដើម្បីដកស្រង់យកមក បង្ហាត់បង្ហាញដល់ក្មួយៗនិសិ្សត ឲ្យមានការយល់ដឹងកាន់តែច្រើន មានជំនាញច្បាស់លាស់ និងពិតប្រាកដ ។
លោកបណ្ឌិត ពេជ សោភ័ន បានបន្តថា គោលនយោបាយរបស់រាជរដ្ឋាភិបាល គឺសំដៅទៅលើការអភិវឌ្ឍន៍ធនធានមនុស្ស ជាជំហានដំបូង ពីព្រោះប្រទេសដែលសម្បូរទៅដោយធនធានមនុស្ស ដែលមានសមត្ថភាព គឺជាប្រទេសមួយដែលមានសក្តានុពលខ្លាំង និងមានការអភិវឌ្ឍន៍យ៉ាងឆាប់រហ័សបំផុត ។ ក្នុងនោះលោកបណ្ឌិត ពេជ សោភ័ន ក៏បានណែនាំឲ្យសិស្សនិសិ្សតត្រូវយកចិត្តទុកដាក់ក្នុងការសិក្សា ព្រោះនៅពេលក្មួយៗមានជំនាញពិតប្រាកដច្បាស់លាស់ ក្មួយៗនិងក្លាយខ្លួនទៅជារូបិយប័ណ្ណ ដែលចាយមិនចេះអស់ ហើយប្រទេសជាតិរបស់យើង និងចាកចេញឆ្ងាយពីភាពក្រីក្រ ដែលធ្វើឲ្យប្រទេសរបស់យើងនិងក្លាយខ្លួនជាប្រទេសមួយ ដែលមានចំណូលមធ្យមកម្រិតខ្ពស់ នាថ្ងៃខាងមុខជាក់ជាមិនខាន ។
សូមបញ្ជាក់ផងដែរថា ក្នុងពិធីប្រកាសតែងតាំងលោក ធូ សុភាព ជានាយកវិទ្យាស្ថានពហុបច្ចេកទេសភូមិភាគតេជោសែនតាកែវ នេះគឺជំនួសលោក ប៉ាន់ ណូរ៉ា ដែលត្រូវបានចូលនិវត្តន៍ និងផ្ទេរមុខតំណែងមកជាទីប្រឹក្សាក្រសួងការងារ និងបណ្តុះបណ្តាលវិជ្ជាជីវៈវិញ ។
ជាមួយគ្នានេះដែរ លោក អ៊ូច ភា អភិបាលខេត្តតាកែវ បានចាត់ទុកថា ការចាប់យកការរៀនជំនាញពិត ពីវិទ្យាស្ថានពហុបច្ចេកទេសភូមិភាគតេជោសែនតាកែវនេះ បានធ្វើឲ្យក្រុមនិសិ្សតមានឱកាសច្រើន ក្នុងការទទួលបានប្រាក់កម្រៃខ្ពស់ ពីការងារ និងជំរុញឲ្យមានកំណើនសេដ្ឋកិច្ចនៅក្នុងប្រទេស៕ដោយ៖ តាកែវ