រដ្ឋាភិបាលវៀតណាម បានថ្លែងកាលពីថ្ងៃព្រហស្បតិ៍ម្សិលមិញថា វៀតណាមនឹងបញ្ឈប់ការចេញទិដ្ឋការដល់អ្នកទេសចរចិន។
ការប្រកាសបែបនេះ ក្រោយពេលវៀតណាមបានរកឃើញមានអ្នកឆ្លងវីរុសកូរ៉ូណាចំនួន ៣ករណីថ្មីទៀត ហើយបច្ចុប្បន្នមានអ្នកឆ្លងវីរុសមរណៈនេះ រហូតដល់ ៥នាក់។
រដ្ឋាភិបាលនិយាយក្នុងសេចក្តីថ្លែងការណ៍ថា “ការផ្ទុះមានការរីករាលដាលលឿន និងស្ថិតក្នុងលក្ខណៈធ្ងន់ធ្ងរ”។
កាលពីសប្តាហ៍មុន ក្រសួងសុខាភិបាលវៀតណាមនិយាយថា ប្រជាជនចិនចំនួន ២នាក់នៅក្នុងវៀតណាម ត្រូវគេធ្វើតេស្ត និងរកឃើញថាមានវីរុសកូរ៉ូណា។ ម្នាក់បានជាសះស្បើយ។
សូមបញ្ជាក់ថា ប្រជាជនចិនមានចំនួនស្មើនឹង ១ភាគ ៣នៃភ្ញៀវទេសចរអន្តរជាតិដែលបានមកលេងវៀតណាម កាលពីឆ្នាំមុន។ នេះបើតាមស្ថិតិរបស់រដ្ឋាភិបាលវៀតណាម។
ប្រទេសជាច្រើនបានធ្វើការជំរុញឲ្យប្រជាពលរដ្ឋខ្លួន មិនឲ្យធ្វើដំណើរទៅចិន ខណៈប្រទេសមួយចំនួនទៀត បានហាមអ្នកធ្វើដំណើរមកពីទីក្រុងវូហាន ចូលក្នុងប្រទេសរបស់ខ្លួន៕
អត្ថបទប្រែសម្រួលដោយ៖ សុភ័ក្រ
ប្រភព៖ The Strait Times