ភ្នំពេញ៖ ថ្លែងនៅក្នុងសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ នៃសហព័ន្ធកីឡាលើកទម្ងន់កម្ពុជា នៅព្រឹកថ្ងៃទី៣១ ខែមករា ឆ្នាំ២០២០ នៅទីស្នាក់ការគណៈកម្មាធិការជាតិអូឡាំពិកកម្ពុជា,លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាប្រធានសហព័ន្ធកីឡាលើកទម្ងន់កម្ពុជាបញ្ជាក់ថា ដោយសារសហព័ន្ធទើបតែត្រូវបានបង្កើតឡើងក្នុងរយៈពេល២ឆ្នាំ ទើបពុំទទួលបានការគាំទ្រពីមហាជន។
ជាមួយគ្នានោះ លោកបានស្នើសុំឲ្យសមាជិកគណៈកម្មាធិការប្រតិបត្តិសហព័ន្ធត្រូវបន្ដរួមគ្នា ផ្សព្វផ្សាយ និងពង្រឹងប្រភេទកីឡាអូឡាំពិកនេះឲ្យរីកចម្រើន។ លោកបន្ដថា ទោះបីជាសហព័ន្ធនេះទើបតែបង្កើតឡើងនៅកម្ពុជាក៏ពិតមែន ប៉ុន្តែប្រភេទកីឡាអូឡាំពិកនេះមានយូរមកហើយ នៅលើពិភពលោក។ ដើម្បីឲ្យមានសមត្ថភាពអាចចូលរួមប្រកួតប្រជែងលើឆាកអន្ដរជាតិបាន នាថ្ងៃខាងមុខ សមាជិកសហព័ន្ធត្រូវតែសហការគ្នា ដើម្បីកៀគរកីឡាករ កីឡាការិនីឲ្យចូលរួមហ្វឹកហាត់ឲ្យបានកាន់តែសម្បូរបែប ដើម្បីឲ្យសហព័ន្ធជំនាញមួយនេះអាចសម្រិតសម្រាំងបានអ្នកមានទេពកោសល្យសម្រាប់ជាតិ នាថ្ងៃអនាគត។ លោកប្រធានសហព័ន្ធបានអំពាវនាវឲ្យមានការចូលរួមពីបណ្តាក្រុមហ៊ុនឯកជន នានាដើម្បីរួមចំណែកដល់ការអភិវឌ្ឍកីឡានេះឲ្យកាន់តែល្អប្រសើរបន្ថែមទៀត។
សូមបញ្ជាក់ថា សហព័ន្ធកីឡាលើកទម្ងន់កម្ពុជា ត្រូវបានបង្កើតឡើង ក្នុងឆ្នាំ២០១៨ ដោយបានសម្រេចនូវផែនការមួយចំនួន ក្នុងសកម្មភាពបំផុសស្មារតីឲ្យយុវជននានាឲ្យចូលរួមលេងកីឡាមួយនេះ ជាបន្តបន្ទាប់៕ដោយ៖បញ្ញាស័ក្តិ
