ភ្នំពេញ៖ អាជ្ញាធររាជធានីភ្នំពេញ បានប្រាប់ប្រជាពលរដ្ឋអាចបង់ប្រាក់ថ្លៃប្រមូលសំរាម ចាប់ពីដើមខែកុម្ភៈនេះតទៅ ដើម្បីបំពេញកាតព្វកិច្ចជាពលរដ្ឋល្អ ក្នុងការចូលរួម ធានាធ្វើឲ្យរាជធានីភ្នំពេញ នៅតែរក្សាបានភាពស្អាត មានផាសុកភាព និងគុណភាពបរិស្ថាន តាមរយៈប្រព័ន្ធទូរទាត់អេឡិចត្រូនិច ដើម្បីបង្កលក្ខណៈងាយស្រួលដល់ប្រជាពលរដ្ឋចំណេញពេលវេលា និងកាត់បន្ថយការចំណាយផ្សេងៗ។
ដើម្បីឲ្យប្រជាពលរដ្ឋបានយល់ដឹងកាន់តែច្បាស់លាស់ ជុំវិញការបង់ថ្លៃសេវាសំរាម ថាតើប្រជាពលរដ្ឋទៅបង់នៅកន្លែងណា នៅទីណា នីតិវិធីបែបណានោះ នាព្រឹកថ្ងៃទី១ ខែកុម្ភៈឆ្នាំ២០២០ នេះអាជ្ញាធររាជធានីភ្នំពេញ លោក ហួត ហៃអភិបាលរងរាជធានីភ្នំពេញ និងលោកកើត ឆែ អភិបាលរងរាជធានីភ្នំពេញ បានធ្វើសន្និសីទកាសែត ដើម្បីបង្ហាញឲ្យសាធារណជនទាំងអស់ បានយល់ជ្រោតជ្រាបពីនីតិវិធីនៃការបង់ថ្លៃសំរាមនេះ។
លោក ហួត ហៃ បានបញ្ជាក់ឲ្យដឹងថា ប្រជាពលរដ្ឋអាចបង់ថ្លៃសំរាមបាន តាមប្រព័ន្ធអេឡិចត្រូនិក ធនាគារ ACLEDA ធនាគារឯកទេស Wing eMoney Lyhour Weilut Pi Pay True Money និងDara Payដោយក្នុងមួយប្រតិបត្តិការ ចំណាយថ្លៃសេវាចាប់ពី៥០០រៀល ទៅ៨០០រៀលតែប៉ុណ្ណោះ ។
លោក បានបន្តថា ដោយបងប្អូនគ្រាន់តែយកលេខកូដ ID ក្នុងវិក្កយបត្រភ្លើងក្នុងខែតុលាឆ្នាំ២០១៩ជាគោល គឺប្រជាពលរដ្ឋ គ្រាន់តែយកលេខកូដ នៅក្នុងវិក្កយបត្រភ្លើង ក្នុងខែតុលា ឆ្នាំ២០១៩ ទៅប្រគល់ឲ្យភ្នាក់ងារវេរលុយខាងលើ ដោយប្រាប់ថា មកបងថ្លៃសំរាមគេនឹង ឆែកលេខកូដរបស់បងប្អូន ហើយតាមរយៈលេខកូដដែលបានឆែកឃើញ វានឹងចេញជាទិន្នន័យទឹកប្រាក់របស់បងប្អូនត្រូវបង់ហើយ ដោយបើកទទួលយកថ្លៃប្រមូលសំរាមពីប្រជាពលរដ្ឋ ចាប់ថ្ងៃទី១ ខែកុម្ភៈនេះតទៅ។
លោក កើត ឆែ អភិបាលរងរាជធានីភ្នំពេញ បានថ្លែងថា ប្រជាពលរដ្ឋអាចបង់ថ្លៃសេវាសំរាមសម្រាប់ខែមករា ទៅតាមទំហំទឹកប្រាក់នៃ ការបង់ ប៉ុន្តែប្រជាពលរដ្ឋក៏អាចបង់ជាឆ្នាំក៏បាន ដោយមានភាពចំណេញច្រើនគឺអស់ថ្លៃសេវា តែម្តងប៉ុណ្ណោះ។ លោកអភិបាលរងបាន បញ្ជាក់ថា ប្រជាពលរដ្ឋដែលត្រូវបង់ថ្លៃសេវាប្រមូលសំរាម នៅក្នុងខែមករានេះ គឺគ្មានការប្រែប្រួលទេ គឺអនុវត្តន៍តាម តារាងតម្លៃកាលពីខែតុលា ឆ្នាំ២០១៩កន្លងទៅជាគោល។
លោកបន្តទៀតថា ការបង់សេវាសំរាមពុំមែនជាការបង់ដោយស្ម័គ្រចិត្តទេ ព្រោះយើងជាអ្នកផលិតសំរាមត្រូវ តែបង់លុយ មិនអាចគេចវេះបានទេ។ ក្នុងអំឡុងអន្តរកាលនេះ គឺឲ្យគាត់បង់ពីថ្ងៃទី១ ដល់ថ្ងៃទី១៥ ខែកុម្ភៈ បើយឺតពេលនេះយើងកត់ចូលជាបំណុល។ ក្នុងករណីមិនបង់គឺយើង មានវិធានការ ឧទាហណ៍ ម្ចាស់ភោជនីយដ្ឋានមិនបង់ គឺដកហូតការធ្វើអាជីវកម្ម ទាល់តែបង់ ទើបប្រគល់ឲ្យវិញ។ ប៉ុន្តែក្នុងអំឡុងពេលអន្តរកាលនេះ យើងមិនទាន់អនុវត្តវិធានការច្បាប់ទេ គឺទុកឲ្យគាត់ មកបង់លុយប្រកបដោយមនសិការស្នេហាជាតិ ដើម្បីធានាឲ្យ ទីក្រុងយើងមានសោភ័ណភាពស្រស់ស្អាត។
សូមបញ្ជាក់ថា ការអនុវត្តប្រព័ន្ធបង់ប្រាក់ថ្មីតាមរយៈអេឡិចត្រូនិចនេះ បានធ្វើឡើងបន្ទាប់ពី រដ្ឋបាលរាជធានីភ្នំពេញ បានទទួលសិទ្ធិក្នុងការធ្វើប្រតិបត្តិការធ្វើអាជីវកម្មអន្តរកាល នៃការប្រមូលសំរាមនៅរាជធានីភ្នំពេញ ដោយរង់ចាំការដេញថ្លៃរបស់ក្រុមហ៊ុនប្រមូលសំរាមថ្មី៕ដោយ៖កូឡាប
