សហរដ្ឋអាមេរិចបានប្រកាសគ្រោះអាសន្នសុខភាពសាធារណៈ ជុំវិញការរីករាលដាលដ៏លឿនរបស់វីរុសកូរ៉ូណា និងបាននិយាយថា ខ្លួននឹងធ្វើការហាមជនបរទេសទាំងអស់ ដែលទើបទៅលេងចិន ចូលក្នុងប្រទេសរបស់ខ្លួន។
រដ្ឋមន្រ្តីសុខាភិបាលអាមេរិចលោក Alex Azar បាននិយាយថា ប្រជាពលរដ្ឋអាមេរិចដែលទើបនឹងត្រឡប់មកពីខេត្តហូប៉ី នឹងត្រូវដាក់ឲ្យនៅដោយឡែកពីគេរយៈពេល ១៤ថ្ងៃ ខណៈអ្នកដែលទើបនឹងមកពីតំបន់ផ្សេងៗនៃប្រទេសចិន នឹងអនុញ្ញាតឲ្យពិនិត្យមើលស្ថានភាពផ្ទាល់ខ្លួនពួកគេក្នុងរយៈពេលដូចគ្នា។
លោកបញ្ជាក់ក្នុងសេចក្តីប្រកាសថា ជនបរទេសទាំងអស់ ដែលបានធ្វើដំណើរទៅកាន់ប្រទេសចិន ក្នុងរយៈពេល ១៤ថ្ងៃចុងក្រោយ នឹងមិនអនុញ្ញាតឲ្យចូលអាមេរិចនោះឡើយ។
កាលពីថ្ងៃសុក្រម្សិលមិញនេះ មានការរកឃើញករណីវីរុសកូរ៉ូណាថ្មីមួយទៀតនៅអាមេរិច ធ្វើឲ្យអ្នកឆ្លងវីរុសសរុបកើនដល់ ៧នាក់។
សូមបញ្ជាក់ថា តួលេខចុងក្រោយនៃអ្នកស្លាប់ ដោយសារវីរុសដ៏កាចសាហាវ បានកើនឡើងដល់ចំនួន ២៥៩នាក់នៅក្នុងប្រទេសចិន ខណៈអ្នកឆ្លងកើនដល់១១.៩៤៦នាក់ទូទាំងពិភពលោក។
អ្នកស្លាប់ភាគច្រើនគឺស្ថិតនៅក្នុងទីក្រុងវូហាន ខេត្ត ហូប៉ី ដែលជាកន្លែងផ្ទុះវីរុសមរណៈនេះ។
ចំណែកអ្នកជាសះស្បើយ មានចំនួន ២៥៩នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
