ខេត្តព្រះសីហនុ៖ ប្រជាពលរដ្ឋភាគច្រើន រស់នៅក្នុងក្រុងព្រះសីហនុ បានសាទរ ចំពោះសកម្មភាព របស់រដ្ឋបាលខេត្តព្រះសីហនុ ដែលបើកយុទ្ធនាការស្តារអូរប្រឡាយ ដើម្បីបញ្ចៀសជំនន់ទឹកភ្លៀង ជនលិចក្រុងព្រះសីហនុ នាបណ្តាឆ្នាំខាងមុខ។
ការសាទនេះ បានកើតឡើងក្រោយពេល រដ្ឋបាលខេត្តព្រះសីហនុ បានប្រើប្រាស់គ្រឿងចក្រ ដើម្បីវាយកម្ទេចសំណង់អត់ច្បាប់តូចធំទាំងអស់ ដែលម្ចាស់សង់ នៅលើចំណីអូរប្រឡាយ បណ្តាលឲ្យស្ទះចរន្តទឹកហូរ នាំឲ្យលិចលង់លំនៅដ្ឋាន របស់ប្រជាពលរដ្ឋមួយចំនួន រស់នៅក្រុងព្រះសីហនុ នារដូវវស្សាចូលមកដល់ម្តងៗ។
ផ្តើមពីបញ្ហានេះ ប្រជាពលរដ្ឋភាគច្រើន រស់នៅក្នុងក្រុងព្រះសីហនុ ជាពិសេសប្រជាពលរដ្ឋ ដែលមានផ្ទះនៅក្នុងតំបន់ទំនាប បានថ្លែងអំណរគុណចំពោះថ្នាក់ដឹកនាំរដ្ឋបាលខេត្តព្រះសីហនុ, ថ្នាក់ដឹកនាំក្រសួងស្ថាប័នពាក់ព័ន្ធ ជាពិសេសអរគុណ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបន្តជួយគិតគូរពីទុក្ខលំបាក ជូនប្រជាពលរដ្ឋ បន្តរហូតមកដល់ពេលនេះ។
ព្រមជាមួយគ្នានេះ ពួកគាត់ក៏បាន អរគុណ សន្តិភាព ក្រោមការដឹកនាំ របស់ សម្តេចនាយករដ្ឋមន្ត្រី ដែលបានដឹកនាំប្រទេសជាតិ ឲ្យមានការរីកចម្រើនលើគ្រប់វិស័យ ហើយស្រុកទេសមានសុខសន្តិភាពសម្បូរសប្បាយ។
ងាកមក ប្រជាពលរដ្ឋ រស់នៅក្នុងក្រុងព្រះសីហនុ ហើយមានផ្ទះនៅតំបន់ទំនាបឯណោះវិញ រំពឹងថា រដូវវស្សាឆ្នាំក្រោយៗទៀត ជំនន់ទឹកភ្លៀង នឹងលែងលិចលង់ផ្ទះសម្បែង របស់ពួកគាត់ទៀតហើយ៕ ដោយ៖ ដែន សីមា