ខេត្តមណ្ឌលគិរី ៖ ចៅក្រមស៊ើបសួរនៃសាលាដំបូងខេត្តមណ្ឌលគិរី កាលពីថ្ងៃទី២ ខែកុម្ភៈ ឆ្នាំ២០២០ បានសម្រេចចេញដីកាឃុំខ្លួនបុរសម្នាក់ ដាក់ពន្ធនាគារខេត្ត ពាក់ព័ន្ធករណីបាញ់សត្វស្វាកន្ទុយស ជាបទល្មើសធនធានធម្មជាតិថ្នាក់ទី៣ តាមបញ្ញត្តិ នៃ ច្បាប់ស្ដីពីតំបន់ការពារធម្មជាតិ និងបទកាន់កាប់អាវុធដោយខុសច្បាប់ តាមមាត្រា៤៩០ នៃក្រមព្រហ្មទណ្ឌ។
បើតាមរបាយការណ៍របស់មន្ត្រីអនុរក្សដែនជម្រកសត្វព្រៃកែវសីមា បានឲ្យដឹងថា ជនជាប់ ចោទឈ្មោះ លី ឯក ភេទប្រុស អាយុ៣៥ឆ្នាំ មានទីលំនៅបច្ចុប្បន្នរស់នៅភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះ ត្រូវបានមន្ត្រីឧទ្យានុរក្សដែនជម្រកសត្វព្រៃកែវសីមា ចាប់ឃាត់ខ្លួនបានជាមួយវត្ថុតាងជាក់ស្ដែង ពេលជននេះបាញ់សត្វស្វាកន្ទុយស១ក្បាលបណ្ដាលឲ្យងាប់ រួចដឹកតាមម៉ូតូ កាលពីថ្ងៃទី៣១ ខែមករា ឆ្នាំ២០២០ នៅត្រង់ចំណុចភ្នំស្រឡៅ ស្ថិ តក្នុងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី ក្នុងដែនជម្រកសត្វព្រៃកែវសីមា។
បច្ចុប្បន្នសត្វស្វាសពកន្ទុយសត្រូវបានដុតកម្ទេច រីឯវត្ថុតាង ម៉ូតូ១គ្រឿង និងអាវុធវែងកែច្នៃ ១ដើម ត្រូវបានរក្សាទុកបណ្ដោះអាសន្ននៅស្នាក់ការដនជម្រកសត្វព្រៃកែវសីមា ចំណែកជនត្រូវចោទត្រូវបានតុលាការ ឃុំខ្លួនដាក់ពន្ធនាគារខេត្ត៕ ដោយ៖បញ្ញាស័ក្តិ
