ភ្នំពេញ៖ ដើមត្នោតពេជ្រជាច្រើនដើម ដែលរដ្ឋបាលរាជធានីភ្នំពេញបានដាំនៅលើសួនច្បារDN ស្ថិតនៅតាមបណ្តោយផ្លូវសហព័ន្ធរុស្សី មុខក្រសួងការពារជាតិក្នុងខណ្ឌ ៧មករា កាលពីអំឡុងឆ្នាំ២០១៩កន្លងទៅ មកដល់ពេលនេះបាននិងកំពុងបង្អួតសម្រស់ និងការថែទាំសួនច្បារនានា ទាក់ទាញភ្ញៀវទេសចរ និងបានធ្វើឱ្យរាជធានីភ្នំពេញលើកសោភ័ណភាពរាជធានីភ្នំពេញ រីកស្រស់បំព្រងរួចមួយកម្រិតថែមទៀត។
លោកសំ សាមុត ប្រធានអង្គភាពសួនច្បារនិងរុក្ខជាតិ នៃមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា អនុវត្តតាមការណែនាំពីលោក ឃួង ស្រេង អភិបាលរាជធានីភ្នំពេញ អង្គភាពសួនច្បារនិងរុក្ខជាតិ នៃមន្ទីរសាធារណការនិងដឹកជញ្ជូនរាជធានីភ្នំពេញ បានដាំកាលពីអំឡុងឆ្នាំ២០១៩ បាន ដាំដើមត្នោតពេជ្រជាច្រើនដើមនៅលើសួនច្បារDN ក្រោយពីយើងបានដាំស្មៅនិងផ្ការួច ដើម្បីលើកសោភ័ណភាពរាជធានីភ្នំពេញ ឱ្យកាន់តែរីកស្រស់បំព្រងរួចមួយកម្រិតថែមទៀត។
លោកបន្តថា៖ ការដាំដើមត្នោតពេជ្រនៅលើសួនច្បារDNនេះ មួយចំណែកគឺដើម្បីលើក សោភ័ណភាពរាជធានីភ្នំពេញឲ្យកាន់តែមានភាពស្រស់បំព្រង ទាក់ទាញភ្លៀវទេសចរជាតិនិងអន្តរជាតិ ដោយសារតែសួនច្បារDN ស្ថិតនៅក្នុងតាមបណ្ដោយផ្លូវសហព័ន្ធរុស្ស៊ី ដែលជាមហាវិថីមួយត្រូវបានភ្ញៀវជាតិនិងអន្តរជាតិធ្វើដំណើរឆ្លងកាត់រាល់ថ្ងៃ។
សួនច្បារDNក្រៅពីលើកសោភ័ណភាពរាជធានីភ្នំពេញហើយនោះ វាក៏ជាកន្លែងសម្រាប់ឲ្យប្រជាពលរដ្ឋបានហាត់ប្រាណ ទាំងពេលព្រឹក ពេលល្ងាចនិងពេលរាត្រីផងដែរ ដែលតម្រូវឱ្យរដ្ឋបាលរាជធានីភ្នំពេញ ធ្វើការថែទាំរាល់ថ្ងៃ។ លោកបន្តថា៖ សួនច្បារសាធារណៈមួយចំនួននៅក្នុងរាជធានីភ្នំពេញ ត្រូវបានមើលថែដោយមន្ទីរសាធារណការ និងដឹកជញ្ជូនរាជធានីភ្នំពេញ និងខណ្ឌចំនួន៤ នៅកណ្តាលក្រុង ក្នុងនោះមានខណ្ឌដូនពេញ ចំការមន ៧មករា និងទួលគោក។ ចំណែកខណ្ឌ៨ខណ្ឌទៀត ទទួលខុសត្រូវមើលថែទាំដោយក្រុមហ៊ុនឯកជន។
គួរបញ្ជាក់ផងដែរថា៖ ក្រោមការដឹកនាំរបស់លោកឃួង ស្រេង អភិបាលរាជធានីភ្នំពេញ បានធ្វើការកែសម្រួលសួនច្បារសាធារណៈនានា នៅក្នុងរាជធានីភ្នំពេញ ជាមួយនិងការស្ថាបនាបង្គន់សាធារណៈស្អាតៗ និងមានស្តង់ដារដាក់តាមសួនច្បារផងដែរ ។ ដោយហេតុថា សួនច្បារមិនត្រឹមតែជាកន្លែងទាក់ទាញនូវភ្ញៀវជាតិអន្តរជាតិប៉ុណ្ណោះទេ ប៉ុន្តែវាក៏ជាកន្លែងមួយ ទុកឱ្យប្រជាពលរដ្ឋបានអង្គុយលេងកម្សាន្តផងដែរ។ ផ្តើមចេញពីបញ្ហានេះ ទើបរដ្ឋបាលរាជធានីភ្នំពេញ បានធ្វើការកែសម្រួលធ្វើយ៉ាងណា ឲ្យតាមបណ្ដាលសួនច្បារនីមួយៗគឺសុទ្ធតែ មានកន្លែងសម្រាប់ឱ្យប្រជាពលរដ្ឋបានហាត់ប្រាណ ព្រោះថាការហាត់ប្រាណជាឱសថដ៏សក្តិសិទ្ធ ក្នុងការព្យាបាលជំងឺគ្រប់ប្រភេទ៕ ដោយ៖បញ្ញាស័ក្តិ