វេជ្ជបណ្ឌិតនៅក្នុងប្រទេសថៃ បាននិយាយថា ពួកគេអាចព្យាបាលអ្នកជំងឺផ្ទុកវីរុសកូរ៉ូណាម្នាក់ជាសះស្បើយ ដោយប្រើប្រាស់ថ្នាំសម្រាប់ព្យាបាលផ្តាសាយ និងថ្នាំប្រឆាំងវីរុសហ៊ីវបូកបញ្ជូលគ្នា។
លោកវេជ្ជបណ្ឌិត Kriangsak Atipornwanich មកពីមន្ទីរពេទ្យ Rajavithi ទីក្រុងបាងកក បាននិយាយថា គាត់ព្យាបាលអ្នកជំងឺស្រ្តីវ័យ ៧១ឆ្នាំមកម្នាក់មកពីចិនជាសះស្បើយ ដោយប្រើថ្នាំផ្តាសាយ និងថ្នាំប្រឆាំងវីរុសហ៊ីវ (HIV)។ ដំបូងឡើយអ្នកជំងឺនោះ ត្រូវបានព្យាបាលដោយថ្នាំប្រឆាំងវីរុសហ៊ីវតែប៉ុណ្ណោះ។
លោកថ្លែងដូច្នេះថា “ខ្ញុំបានព្យាបាលអ្នកជំងឺដែលកំពុងស្ថិតក្នុងស្ថានភាពធ្ងន់ធ្ងរ ហើយវាផ្តល់លទ្ធផលគួរជាទីពេញចិត្តណាស់”។
“ស្ថានភាពអ្នកជំងឺបានប្រសើរឡើងយ៉ាងលឿនក្នុងរយៈពេល ៤៨ម៉ោង ហើយលទ្ធផលធ្វើតេស្តវីរុសបានប្រែពីវិជ្ជមានទៅជាអវិជ្ជមានវិញ ក្នុងរយៈពេល ៤៨ម៉ោង”។
មន្រ្តីសុខាភិបាលថៃ បានថ្លែងក្នុងសន្និសីទសារព័ត៌មានថា ការធ្វើតេស្តនៅក្នុងមន្ទីរពិសោធន៍ បានបង្ហាញថា មិនមានសញ្ញានៃវីរុសនៅក្នុងប្រព័ន្ធផ្លូវដង្ហើមអ្នកជំងឺទៀតឡើយ។
សូមបញ្ជាក់ថា វីរុសកូរ៉ូណា បានសម្លាប់ជីវិតមនុស្ស និងរីករាលដាលយ៉ាងលឿនទូទាំងពិភពលោក។ តួលេខចុងក្រោយបានបង្ហាញថា មនុស្សចំនួន ៣៦២នាក់បានស្លាប់ដោយសារវីរុសដ៏សាហាវនេះ ដោយក្នុងនោះមានម្នាក់ស្លាប់នៅហ្វីលីពីន និងបានចម្លងទៅកាន់មនុស្សជាង ១៧.០០០នាក់ទូទាំងពិភពលោក។
ចំណែកអ្នកដែលជាសះស្បើយពីវីរុសនេះ មានចំនួនសរុប ៤៨៧នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia