ភ្នំពេញ៖ លោកវីល្លាម សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ មកពីគណបក្សខ្មែរក្រោក បានសរសេរសារលើ facebook ថា នេះជាផ្ទះខុសច្បាប់នៅក្រុងព្រះសីហនុ ដែលនាំគ្នាសង់លើប្រឡាយរបស់រដ្ឋបើនាំគ្នាធ្វើផ្ទះលើប្រឡាយអស់ហើយរឿងអីមិនទឹកលិចក្រុង។
លោកបន្តថា ផ្ទះអស់នេះ មានខ្លះសង់នៅសម័យលោកយន្ត មីន ជាអភិបាលខេត្ត ហើយបញ្ហានៅត្រង់ថាម្ដេចអាជ្ញាធរដែនដីមិនអើពើពេលសង់ដំបូង ?
លោកបញ្ជាក់ថា ការរំលោភបំពានលើទ្រព្យសម្បត្តិសាធារណៈអាជ្ញាធរ គួរតែមានវិធានការឲ្យបានតឹងរ៉ឹងបំផុត កុំយោគយល់ ។
បើតាមការផ្សព្វផ្សាយរបស់ផេកហ្វេសប៊ុក ប្រជាជនខេត្តព្រះសីហនុ ថា រូបភាពមួយនេះ ទុកជូនបងប្អូនប្រជាពលរដ្ឋ និងសាធារណជន វិនិច្ឆ័យ និងបញ្ចេញមតិ តាមការគួរ ។
ប្រជាពលរដ្ឋដែលជាម្ចាស់ផ្ទះ សង់លំនៅដ្ឋានរំលោភ លើប្រឡាយទឹកនៅលើអូរម៉ារីយ៉ូ ក្រោយពីអាជ្ញាធរចុះផ្សព្វផ្សាយ ណែនាំពីការរៀបចំអូ ប្រឡាយទឹកឡើងវិញនោះ ពេលនេះពួកគាត់បានទទួលយល់ព្រម ដោយឲ្យខាងអាជ្ញាធរស្តារឡើងវិញពីបញ្ហាកក់ស្ទះប្រពន្ធ័បង្ហូរទឹកនៅក្នុងក្រុងព្រះសីហនុ ។
គ្រាន់តែគាត់សុំពេលរុះរើ ផ្ទះរបស់គាត់ចេញ អរគុណបងប្អូនដែលសហការល្អជាមួយអាជ្ញាធរ ។
សូមបញ្ឈប់ការយកប្រព័ន្ធ/ចំណីអូរ ប្រឡាយ និងហាមដាច់ខាត រាល់ការសាងសង់សំណង់គ្រប់ប្រភេទ ។ ប្រព័ន្ធ/ចំណីអូរ ប្រឡាយ គឺជាប្រព័ន្ធរំដោះទឹក បញ្ចៀសហានិភ័យដូចជាករណីជំនន់ទឹកភ្លៀងជាដើម ។
ប្រព័ន្ធ/ចំណីអូរ ប្រឡាយ មិនមែនជាចំណាប់ខ្មាំង សម្រាប់បុគ្គលទាំងឡាយណា ចាប់យកមកគ្រប់គ្រង ដើម្បីយកមកតថ្លៃ ឬទាមទារជាប្រាក់ឬសំណងពីរដ្ឋនោះឡើយ ។
ការចាប់យកប្រព័ន្ធ/ចំណីអូរ ប្រឡាយ មកគ្រប់គ្រង និងធ្វើការសាងសង់ ជាសកម្មភាពមិនស្របច្បាប់ ហើយអាចប្រឈមមុខចំពោះមុខច្បាប់ជាធរមាន ។
ជ្រុងមួយ នៃការពិត ដែលចង់បង្ហាញឲ្យអ្នកបានដឹង។ មូលហេតុនៃការលិចលង់ក្រុងព្រះសីហនុ គឺដោយសារការសាងសង់សំណង់ផ្សេងៗ រំលោភចូលចំណីអូរប្រឡាយ ហេតុដូច្នេះបើយើងមិនរៀបចំប្រព័ន្ធរំដោះទឹកជំនន់នេះបានទេ ក្រុងព្រះសីហនុ នឹងទទួលរងការលិចលង់បន្តទៀត ៕ ដោយ៖បញ្ញាស័ក្តិ