តាកែវ៖ ថ្លែងនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកខេត្តតាកែវ នាព្រឹកថ្ងៃទី៤ ខែកុម្ភៈ ឆ្នាំ២០២០ នៅសាលប្រជុំមន្ទីរសាធារណការ និងដឹកជញ្ជូនខេត្តតាកែវ លោក ខាន់ សុខា អភិបាលរងខេត្តតាកែវ បានជំរុញឲ្យនគរបាលចរាចរណ៍ផ្លូវគោកត្រូវអនុវត្តន៍ច្បាប់យ៉ាងតឹងរ៉ឹងបំផុត ដោយគ្មានការយោគយល់ឡើយ ទៅលើមន្ត្រីរាជការដែលមិនបានគោរពច្បាប់ចរាចរណ៍ ដោយបើកបរម៉ូតូឬយានជំនិះផ្សេង មិនបានពាក់មួកសុវត្ថិភាព ឬគ្មានកញ្ចក់មើលក្រោយ ដែលចំណុចនេះជាគំរូដល់អាក្រក់បំផុត ដែលធ្វើឲ្យប្រជាពលរដ្ឋ មិនបានចូលរួមគោរពច្បាប់ទាំងអស់គ្នា ។
លោកបានបន្ត ច្បាប់ដែលបង្កើតឡើងគឺ មិនមែនសម្រាប់តែអនុវត្តទៅលើអ្នកណាម្នាក់នោះទេ គឺត្រូវអនុវត្តទៅលើប្រជាពលរដ្ឋទូទៅ មិនថាមន្ត្រីរាជការឡើយ ដូច្នេះដើម្បីចូលរួមកាត់បន្ថយនៅគ្រោះថ្នាក់ថ្នាក់ចរាចរណ៍នេះ សូមបងប្អូនប្រជាពលរដ្ឋ ទាំងអស់ ទាំងមន្ត្រីរាជការត្រូវចូលរួមគោរពច្បាប់ទាំងអស់គ្នា ដើម្បីខ្លួនអ្នក គ្រួសាររបស់អ្នក និងសង្គមជាតិរបស់យើង ។
លោកអភិបាលរងខេត្តតាកែវ បានបន្តថា ចំពោះនគរបាលចរាចរណ៍ផ្លូវគោកដែលឈរជើងនៅតាមគោលដៅចំណុច ផ្លូវជាតិលេខ ២ ផ្លូវជាតិលេខ៣ ត្រូវពិនិត្យឲ្យមែនទែនទៅលើការទប់ស្កាត់ និងអនុវត្តច្បាប់ទៅលើរថយន្ត និងរ៉ឺម៉ក កែច្នៃខុសលក្ខណៈបច្ចេកទេស ដែលជាហេតុធ្វើឲ្យកើតមានគ្រោះថ្នាក់ជាយថាហេតុ ដែលបង្កឡើងដោយកត្តាយានយន្ត ជាពិសេសនគរបាលចរាចរណ៍ដែលដាក់ប៉ុស្តិ៍នៅស្រុកគីរីវង់ ជាមួយនិងអាជ្ញាធរស្រុក ត្រូវតែយកចិត្តទុកដាក់កម្រិតខ្ពស់ ព្រោះប្រភពដែលដែលមានរថយន្ត និងរ៉ឺម៉កកែច្នៃទាំងនោះដឹកទំនិញ គឺចេញពីស្រុកគីរីវង់តែម្តង ម្លោះហើយ តើនគរបាល និងអាជ្ញាធរស្រុកត្រូវតែទប់ស្កាត់ឲ្យបាន បើធ្វើមិនបានទេ ប្រាប់មកថ្នាក់លើមក ទុកឲ្យអ្នកនៅស្រុកបន្តជាអ្នកទប់ស្កាត់ ។
សូមបញ្ជាក់ផងដែរថា បើតាមរបាយការណ៍របស់ស្នងការដ្ឋាននគរបាលខេត្តតាកែវ បានបង្ហាញថា នៅក្នុងខែមករាឆ្នាំ២០២០នេះ មានករណីគ្រោះថ្នាក់ចរាចរណ៍ចំនួន ៨លើក លើ៧លើក កើនឡើងចំនួន ១លើក ក្នុងនោះបណ្តាលឲ្យមនុស្សចំនួន ១៩នាក់រងរបួសធ្ងន់ស្រាល មិនមានស្លាប់ឡើយ ហើយធ្វើឲ្យខូតខាតមធ្យោបាយយានជំនិះសរុបចំនួន ១៨គ្រឿង លើ ១៤គ្រឿង បណ្តាលមកពីមូលហេតុ ដោយកត្តាមនុស្ស ទាំង ៨ករណី បើកបរលើសល្បឿន ៥ករណី មិនគោរពសិទ្ធិអាទិភាព ១ករណី ធ្វេសប្រហែស ១ករណី បើកបរជែងគ្នាក្នុងស្ថានភាពគ្រោះថ្នាក់ ១ករណី ។
ជាមួយគ្នានឹងលទ្ធផលនេះដែរ លោក ណុប នី ប្រធានមន្ទីរសាធារណការ និងដឹកជញ្ជូនខេត្តតាកែវ បានធ្វើការស្នើសុំទៅអាជ្ញាធរពាក់ព័ន្ធទាំងអស់ ចូលរួមបន្តនូវយន្តការចុះផ្សព្វផ្សាយបន្ថែម ទៅលើប្រព័ន្ធច្បាប់ចរាចរណ៍ផ្លូវគោក ឲ្យបានទូលំទូលាយបន្ថែមទៀត និងបើកយុទ្ធនាការចុះអនុវត្តច្បាប់ទៅលើរថយន្ត និងរ៉ឺម៉កកែច្នៃដែលកំពុងចរាចរណ៍ដឹកសំពីងសំពោងនូវលើដងផ្លូវ មួយវិញទៀតមន្ទីរ និងធ្វើការដាក់ស្លាកសញ្ញា និងគំនូសសញ្ញាលើដងផ្លូវ បន្ថែមទៅលើចំណុចសំខាន់ៗមួយចំនួន នៅតាមទីប្រជុំជនមួយចំនួនទៀត ដើម្បីរួមចំណែក ក្នុងការពញ្ញាក់ស្មារតី ដល់អ្នកបើកបរទាំងអស់ឲ្យមានការប្រុងប្រយ័ត្នខ្ពស់ នៅពេលកំពុងបើកបរលើដងផ្លូវនៅទីប្រជុំជន ៕ដោយ៖ តាកែវ