បុរសម្នាក់បានស្លាប់នៅទីក្រុងហុងកុងដោយសារវីរុសកូរ៉ូណា ដែលនេះជាករណីស្លាប់ដំបូងនៅក្នុងទីក្រុង និងជាអ្នកជំងឺទី ២ដែលបានស្លាប់នៅក្រៅប្រទេសចិន។
អ្នកជំងឺវ័យ ៣៩ឆ្នាំរូបនោះ ដែលត្រូវបានគេព្យាបាលនៅមន្ទីរពេទ្យក្រោយពេលឆ្លងវីរុសកូរ៉ូណា បានស្លាប់ដោយសារបញ្ហាបេះដូងភ្លាមៗ។ នេះបើតាមសេចក្តីរាយការណ៍នៅថ្ងៃអង្គារនេះ។
អាជ្ញាធរពេទ្យបាននិយាយថា អ្នកជំងឺនោះស្លាប់ដោយសារជំងឺ។ គាត់បានធ្វើដំណើរទៅកាន់ទីក្រុងវូហាន កាលពីថ្ងៃទី ២១ ខែមករាកន្លងទៅ មុនពេលត្រឡប់មកកាន់ទីក្រុងហុងកុងវិញ ២ថ្ងៃបន្ទាប់។
ទីក្រុងហុងកុង មានការឆ្លងវីរុសមរណៈកូរ៉ូណាទាំងអស់ចំនួន ១៥ករណី។
ហុងកុងជាទីក្រុងទី ២ដែលមានករណីស្លាប់ដោយសារវីរុសកូរ៉ូណា ខណៈដែលភីលីពីនមានករណីស្លាប់ដោយវីរុសនោះដំបូងគេ កាលពីថ្ងៃអាទិត្យកន្លងទៅនេះ។
កាលពីថ្ងៃច័ន្ទម្សិលមិញនេះ មេដឹកនាំហុងកុង អ្នកស្រី Carrie Lam បានប្រកាសបិទព្រំដែនបណ្តោះអាសន្នចំនួន ១០កន្លែងជាមួយនឹងចិន ដើម្បីទប់ស្កាត់ការរីករាលដាលនៃវីរុសនោះ។
សូមបញ្ជាក់ថា ហូតមកដល់ថ្ងៃអង្គារនេះ វីរុសមរណៈកូរ៉ូណា បានផ្តាច់ជីវិតមនុស្សចំនួន ៤២៦នាក់ ខណៈការឆ្លងបានរីករាលដាលទៅកាន់មនុស្សជាង ២០.០០០នាក់នៅក្នុងប្រទេស និងតំបន់ចំនួន ២៤ទូទាំងពិភពលោក។ មានអ្នកជំងឺតែម្នាក់ប៉ុណ្ណោះ ដែលស្លាប់នៅក្រៅប្រទេសចិន នោះគឺក្នុងប្រទេសហ្វីលីពីន។ ចំណែកករណីជាសះស្បើយមានចំនួន ៦៤៤នាក់។
វីរុសដ៏អាថ៌កំបាំងនេះ ត្រូវបានគេជឿជាក់ថាចាប់ផ្តើមផ្ទុះក្នុងខែធ្នូ ចេញពីផ្សារមួយកន្លែងដែលលក់សត្វព្រៃ ស្ថិតក្នុងទីក្រុងវូហាន នៃខេត្តហូប៊េ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
