ភ្នំពេញ៖ ដោយសារតែមានបាតុភាព គ្រូពេទ្យមួយចំនួន បើកអាជីវកម្មរបស់ខ្លួនលើកស្លាកធំៗ ហើយ ជួលគេយកម៉ូតូឌុប ទៅដឹកអ្នកជំងឺ ចេញពីមន្ទីរពេទ្យ មកចូលកន្លែងរបស់ខ្លួននោះ ទើបមន្ត្រីជាន់ខ្ពស់ក្រសួងសុខាភិបាល បានដាក់វិធានការណែនាំនិងទប់ស្កាត់បញ្ហាខាងលើនេះ ហើយអ្នកគ្រប់គ្រងអង្គភាពសុខាភិបាលទាំងឡាយ ត្រូវរំលឹកដល់ក្រុមគ្រូពេទ្យ និងបុគ្គលិកសុខាភិបាល របស់ខ្លួនជាប្រចាំ។
លោកវេជ្ជបណ្ឌិត ធា គ្រុយ រដ្ឋលេខាធិការក្រសួងសុខាភិបាល និងជាប្រធានសមាគមគ្រូពេទ្យកម្ពុជា បានបញ្ជាក់ថា ប្រសិនបើបញ្ហាទាំងនោះកើតឡើង មិនត្រឹមតែប៉ះពាល់ដល់សាមីអ្នកប្រព្រឹត្តនោះទេ សូម្បីតែអ្នកចូលដៃ និងថ្នាក់លើនៃអង្គភាពសុខាភិបាលនោះ ក៏មានបញ្ហាជាមួយគ្នាដែរ។
លោកបានបញ្ជាក់ថា ក្រមសីលធម៌វិជ្ជាជីវៈគ្រូពេទ្យ មិនអនុញ្ញាតឲ្យគ្រូពេទ្យយកវិជ្ជាជីវៈវេជ្ជសាស្ត្រ យកទៅកែច្នៃធ្វើជាជំនួញផ្ទាល់ខ្លួនឡើយ។ ប៉ុន្តែលោកក៏បានទទួលស្គាល់ផងដែរថាបញ្ហានេះនៅតែកើតមានដដែលក្នុងសង្គមកម្ពុជា។
លោក ធា គ្រុយ បានថ្លែងក្នុងទិវាវេជ្ជសាស្ត្ររោគកុមារវិទ្យា លើកទី២០ ដែលរៀបចំឡើងដោយសមាគមគ្រូពេទ្យកម្ពុជា នៅថ្ងៃទី១៣ ខែមករា ឆ្នាំ២០១៨នេះ នាសណ្ឋាគារភ្នំពេញ។
លោក ធា គ្រុយ បានថ្លែងថា វិជ្ជាជីវៈវេជ្ជសាស្ត្រមិនត្រូវបានអនុញ្ញាត ឲ្យយកទៅច្នៃប្រឌិតធ្វើជាមុខជំនួញផ្ទាល់ខ្លួនឡើយ។ វិជ្ជាជីវៈជាពេទ្យ មុននឹងចូលធ្វើពេទ្យ គឺបានសម្រេចថាធ្វើជាពេទ្យ មិនមែនរកស៊ីជំនួញទេ អត់មានបិទផ្សព្វផ្សាយ ដាក់ស្លាកប៉ុនជញ្ជាំងវិហារ អត់មានជួលគេយកម៉ូតូឌុបទៅដឹកអ្នកជំងឺចេញពីមន្ទីរពេទ្យ។ អ្នកជំងឺចង់ចូលពេទ្យមិនបាច់ទេ ទៅកន្លែងនោះវិញល្អជាង ឥឡូវនេះដូចឈ្មួញអីចឹងពេទ្យមួយចំនួន៕ ដោយ៖បញ្ញាស័ក្តិ
