ភ្នំពេញ៖ អង្គការ cpu នៅថ្ងៃទី 4 ខែកុម្ភៈនេះ បានឲ្យដឹងថា “ការធ្វើឃាតកម្មទៅលើកុមារគឺជាអំពើមួយដែលយើងមិនអាចនឹងយល់ ប៉ុន្តែអំពើឃាតកម្មទៅលើទារកគឺយើងស្មានមិនដល់។”
កម្លាំងការងារចម្រុះ ALPHA-20 ត្រូវបានបង្កើតឡើងដើម្បីស៊ើបអង្កេតទៅលើករណីឃាតកម្មទៅលើទារកភេទស្រីដែលមានអាយុត្រឹម ២ទៅ៤សប្តាហ៍ នៅក្នុងខេត្តកណ្តាល។
កាលពីថ្ងៃទី៣១ ខែមករា វេលាម៉ោង៥ និង៣០នាទីល្ងាច កម្លាំងសមត្ថកិច្ចបានរកឃើញសាកសពទារកនៅក្រៅសាលាស្រុក នៅភូមិព្រែកតាមាក់ ខេត្តកណ្តាល។ នគរបាលដ្ខានខេត្តកណ្តាលបានចាប់ផ្តើមធ្វើការស៊ើបអង្កេត ហើយបានទាក់ទងមក CPU។
ពេលព្រឹកថ្ងៃទី៤ ខែកុម្ភៈ ក្រុមការងារស៊ើបអង្កេតបទល្មើសមនុស្សឃាត និងក្រុមការងារបច្ចេកទេសវិទ្យាសាស្ត្ររបស់ CPU, រួមជាមួយនឹងនគរបាលដ្ឋានខេត្តកណ្តាល និងក្រសួងមហាផ្ទៃបានធ្វើការពិនិត្យទៅលើសាកសពរបស់ទារក។
ការត្រួតពិនិត្យបានបង្ហាញថាទារកនេះបានរងរបួសធ្ងន់ធ្ងរមួយចំនួន ដែលបានបង្កអោយស្លាប់ មុននឹងសាកសពត្រូវបានរកឃើញនៅចំហៀងផ្លូវ។
នគរបាលដ្ឋានខេត្តកណ្តាល និងCPU សូមស្នើរសុំអោយមហាជនដែលរស់នៅក្នុង និងជំវិញតំបន់នេះ រាយការណ៍ជូននគរបាលដ្ឋានខេត្តកណ្តាល ឬCPU ប្រសិនបើមានការសង្ស័យថាបាត់ក្មេងដែលមានអាយុប្រហែល១ខែ។ យើងនឹងរក្សាសម្ងាត់អំពីអ្នកផ្តល់ព័ត៌មាន។
សាកសពរបស់ទារកនេះត្រូវបានរកឃើញដោយមានការរុំដោយកន្សែង និងខោរមនុស្សប្រុស (ដូចរូបភាពខាងក្រោម)។ មន្ត្រីស៊ើបអង្កេតបានដកយកភ័ស្តុតាងមួយចំនួនពីកន្លែងកើតហេតុ ថែមទាំងសំណាក DNA របស់ទារកនេះ។
“គ្រប់ករណីឃាតកម្មទៅលើកុមារគឺពិបាកទទួលយកណាស់ សម្រាប់មន្ត្រីស៊ើបអង្កេតគ្រប់រូប ប៉ុន្តែហឹង្សាដែលបានប្រព្រឹត្តទៅលើទារកគឺយើងមិនអាចយល់បាន” – លោក James McCABE នាយកប្រតិបត្ត អង្គភាពការពារកុមារ។
នគរបាលស្រុកខ្សាច់កណ្តាល បានរាយការណ៍ពីករណីប្រទះឃើញសាកសព(ទារក) ។ កើតហេតុថ្ងៃទី៣១.០១.២០២០វេលាម៉ោង១៧.៣០នាទីចំណុច ភូមិក្នុង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ។
ជនរងគ្រោះ ជាទារក មិនស្គាល់អត្តសញ្ញាណ ភេទស្រី អាយុប្រហែល០៧ ថ្ងៃ (ស្លាប់) ។
នៅថ្ងៃទី៣១ មករា ២០២០វេលាម៉ោង១៧និង៣០នាទីប្រជាពលរដ្ឋធ្វើដំណើរ តាមដងផ្លូវលេខ៣៨១ ក្នុងភូមិ
-ឃុំកើតហេតុ បានប្រទះឃើញស្បោងខ្មៅ១ នៅជិតរបងសាលាស្រុកខ្សាច់កណ្តាល ហើយក៏ចុះពិនិត្យមើលឃើញសាកសពទារក ហើយ រាយការណ៍ជូននគរបាលប៉ុស្តិ៍រដ្ឋបាលព្រែកតាមាក់ បន្ទាប់មកសមត្ថកិច្ចជំនាញ សហការ ជាមួយក្រុមប្រឹក្សាឃុំ ព្រែកតាមាក់គ្រូពេទ្យ កម្លាំងប៉ុស្តិ៍ បានចុះពិនិត្យសាកសពទារក ត្រូវបានគេដាក់ក្នុងស្បោងផ្លាស្ទិចពណ៌ខ្មៅ មានស្នាមដាច់រហែក ទុកចោលនៅពីមុខរបងសាលាស្រុកខ្សាច់កណ្តាល សាកសពទារក មានសភាព ហើមរលួយ មុខខ្មៅ មើលមិនស្គាល់ កទន់ស្នាមរបួសនៅជើងឆ្វេង ត្រងជង្គង់ (បាក់ឆ្អឹង)ពោះប៉ោង ខ្មៅ ក្រៅពីនេះពុំ មានស្លាកស្នាមអ្វីផ្សេងទៀតទេ ។
នគរបាលសន្និដ្ឋាន៖សាកសពជាទារក ភេទស្រី មានអាយុប្រហែល០៧ថ្ងៃស្លាប់ប្រហែល០២ ថ្ងៃមកហើយ ត្រូវបានខ្ចប់យកមកទម្លាក់ចោល ។
ក្រោយពីពិនិត្យដោយហ្មត់ចត់បានប្រគល់សាកសពជូន ក្រុមប្រឹក្សាឃុំព្រែកតាមាក់ យកទៅបញ្ចុះនៅក្នុងវត្តព្រែកតាមាក់ ៕ ដោយ៖កូឡាប
