ភ្នំពេញ៖ នៅព្រឹកថ្ងៃទី ៥ ខែកុម្ភៈ ឆ្នាំ ២០២០ នៅទីស្តីការគណៈរដ្ឋមន្រី្ត ដោយស្ថាប័នឧត្តមក្រុមព្រឹក្សាពិគ្រោះនិងផ្តល់យោបល់ បានបើកការប្រជុំ ជាមួយនិងក្រសួងសាធារណការនិង ដឹកជញ្ជូន ឲ្យបំភ្លឺពាក់ព័ន្ធទៅនិងបញ្ហាមួយចំនួនករណីហេដ្ឋារចនាសម្ព័ន្ធផ្លូវថ្នល់ ដោយមាន លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការនិងដឹកជញ្ជូន ដឹកនាំអង្គប្រជុំ និងមានប្រធាន បក្សទាំង១៦ចូលរួមផងដែរ ។
បើយោងទៅផេក Facebook លោក ពេជ្រ ស្រស់ ប្រធានគណបក្សយុវជនកម្ពុជា បានបង្ហោះថា៖ “ខ្ញុំមាន ៤ សំណួរ សួរទៅកាន់ លោកទេសរដ្ឋមន្រ្តី ស៊ុន ចាន់ថុល ខាងក្រោម៖ ១. តើប្រធានមន្ទីរសាធារណការ និងដឹកជញ្ជូន ពិតជាមានរបបពិសេស
ដោយទទួលបានផ្ទះមួយល្វែងនៅតាមបណ្តាខេត្តក្នុងតម្លៃ ៦ ម៉ឺនដុល្លារ ដែលរដ្ឋចំណាយសាងសង់ឲ្យនិងអ្នកបើកបរម្នាក់ ព្រមទាំងចុងភៅធ្វើម្ហូបម្នាក់ដែរ ជាការពិតដែរឬទេ? ហើយការផ្តល់ជូននូវរបបពិសេសនេះគឺជាគោលការណ៍របស់រដ្ឋស្មើភាពដែរឬទេ? ស្របពេលអភិបាលខេត្តមិនមានរបបធ្វើផ្ទះឲ្យនៅទេ។
២. ចំពោះការធ្វើផ្លូវថ្នល់ដែលមិនមាននូវគុណភាពតើក្រសួងសាធារណការ និងដឹកជញ្ជូន មានការទទួលខុសត្រូវកម្រិតណា? ពីព្រោះលុយបានចំណាយបាត់ទៅហើយនោះ
៣. តើហេតុអ្វីបានជាផ្លូវថ្នល់ស្រុកខ្មែរធ្វើគ្មានការធានាច្បាស់លាស់ណាមួយជុំវិញថេរវេលាការប្រើប្រាស់
ដោយឃើញថាធ្វើខាងមុខខូច ឯខាងក្រោយជារឿយៗដូច្នេះនោះ?
៤. តើឯកឧត្តមរដ្ឋមន្រ្តីគិតថាជាការចំណាយលុយជាតិដ៏ខ្ជីខ្ជាដែរទេ នៅពេលផ្លូវថ្នល់ធ្វើមិនបាន១ឆ្នាំ
ផង ស្រាប់តែរុះរើធ្វើសារជាថ្មីនិងជួសជុលជាប់រហូត ស្របពេលស៊ីម៉ងត៍ផ្លូវថ្នល់ គឺមិនទាន់ស្ងួត និងរឹងស្រួលបួលផងនោះ…..?
ចំណែលលោកវីល្លាម ប្រធានគណបក្សខ្មែរក្រោក បានលើកឡើងក្នុងកិច្ចប្រជុំនោះផងដែរថា ”
ចូលរួមប្រជុំដេញដោលជាមួយក្រសួងសាធារណការនិងដឹកជញ្ជូន នៅវិមានសន្តិភាព ក្នុងកិច្ចប្រជុំនេះបញ្ហាមួយចំនួនរួមមាន ៖ គុណភាពផ្លូវថ្នល់ធ្វើមុខខូចក្រោយ. ធ្វើផ្លូវហើយបានជីកផ្លូវដាក់លូ .មានQR code អត់ឯកសានៅតែខុសច្បាប់ . បញ្ហាឡានទំនិញបំផ្លាញថ្នល់ ព្រោះកន្លែងថ្លឹងឡានពុករលួយ ជាដើម ដែលបញ្ហាទាំងនេះ ខ្ញុំនឹងយកមកជជែកដេញដោលរកដំណោះស្រាយលើតុពិភាក្សាជំនួសឲ្យពលរដ្ឋរបស់យើង ដើម្បីឲ្យក្រសួងមានសមត្ថកិច្ចបំភ្លឺអំពីបញ្ហានេះ”៕ដោយ៖កូឡាប
