ត្បូងឃ្មុំ៖ នៅព្រឹកថ្ងៃទី៥ ខែកុម្ភៈឆ្នាំ ២០២០ប្រជាពលរដ្ឋសហគមន៍ភូមិ ស្រែប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំបានជួបជុំគ្នាលើកបដារូបថត ក្នុងគោលបំណងឲ្យតុលាការខេត្តត្បូងឃ្មុំ ដោះលែងតំណាងសហគមន៍របស់ពួកគាត់គឺ លោកសែម សាង ដែលត្រូវសម្ថកិច្ចចាប់ខ្លួនកាលពីថ្ងៃទី ១៧ ខែ តុលា ឆ្នាំ២០១៩ ដោយអយុត្តិធម៌ អ្នកមានចំនួន ប្រហែល ៧០នាក់ ស្រី ៨០%។
កាលពីខែតុលា ឆ្នាំ២០១៩ សមត្ថកិច្ចបានចាប់ខ្លួន តំណាងសហគមន៍ម្នាក់គឺលោក សែម សាង និងត្រូវប្រឈមនឹងបទចោទជាច្រើន ពាក់ព័ន្ធនឹងជម្លោះដីធ្លីមួយរវាង ក្រុមហ៊ុនចិនចំការកៅស៊ូ ហាម៉ឹនី វីន អ៊ិនវេសមេន និងសហគមន៍មួយចំនួននៅស្រុកតំបែរ ខេត្តត្បូងឃ្មុំ។
កាលពីខែតុលា អ្នកភូមិនៅស្រុកតំបែរ បានដើរហែរក្បួនដើម្បីតវ៉ាប្រឆាំងនឹងការចាប់ខ្លួនលើអ្នកទាំងពីរ និងត្រូវបានហាមឃាត់ដោយកងកម្លាំងសន្ដិសុខ ក្នុងការឃ្លាំមើលសវនាការដំបូង ដែលដំណើរការនៅសាលាដំបូងខេត្តត្បូងឃ្មុំ។ អ្នកទាំងនោះក៏ត្រូវបានរារាំងមិនឱ្យឃ្លាំមើលករណីរដ្ឋប្បវេណី ដែលប្ដឹងដោយក្រុមហ៊ុន ហាម៉ឹនី វីន អ៊ិនវេសមេន ក្នុងការស្នើសុំតុលាការ ដើម្បីកុំឱ្យអ្នកភូមិអាចចូលទៅកាន់ដីព្រៃនោះបាន។
ប្រជាពលរដ្ឋប្រមាណជាង៦០០គ្រួសារ ដែលពឹងផ្អែកលើដីសម្រាប់លំនៅដ្ឋាន និងធ្វើស្រែចំការ ត្រូវបានរងគ្រោះដោយជម្លោះដីធ្លី ដែលកើតមានឡើងតាំងពីឆ្នាំ២០១២នេះ។ កាលពីខែមុនថ្មីៗនេះ តំណាងក្រុមហ៊ុន ហាម៉ឹនី វីន អ៊ិនវេសមេន បាននាំគ្រឿងចក្រជាច្រើនគ្រឿងមកឈូសឆាយដី ដែលមានទំនាស់នេះ ដោយមានវត្តមានទាហាន និងនគរបាលប្រហែល៣០នាក់មកជាមួយផងដែរ។ អ្នកភូមិនៅតែបន្តអំពាវនាវស្នើសុំឱ្យអាជ្ញាធរថ្នាក់ជាតិ និងក្រោមជាតិ ឱ្យជួយដោះស្រាយបញ្ហាជម្លោះដីធ្លីនេះ៕ ដោយ៖កូឡាប