ភ្នំពេញ៖ ក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) ថ្ងៃពុធទី៥ ខែកុម្ភៈ ឆ្នាំ២០២០ បានចេញសេចក្ដីជូនដំណឹង ស្ដីពីកិច្ចប្រជុំលើកទី៥៤ អាណត្តិទី២ ដោយលោកតុប សំ ប្រធានក្រុមប្រឹក្សា បានថ្លែងថា ក្រុមប្រឹក្សាជាតិប្រឆាំងអំពើពុករលួយ បានផ្តល់ការលើកទឹកចិត្តដល់អង្គភាពប្រឆាំងអំពើពុករលួយ បន្តធ្វើការងារ និងសហការជាមួយក្រសួងស្ថាប័ន ដើម្បីរួមគ្នាទទួលខុសត្រូវក្នុងការដោះស្រាយបញ្ហារួម។
លោកតុប សំ បានបញ្ជាក់ថា ក្រុមប្រឹក្សាជាតិប្រឆាំងអំពើពុករលួយ បានយកឱកាសដើមឆ្នាំនេះ ស្តាប់របាយការណ៍នៃការកែទម្រង់ ពិភាក្សាអំពីទស្សនៈ យន្តការវាស់វែងការប្រយុទ្ធប្រឆាំងអំពើពុករលួយ។ ក្រុមប្រឹក្សាជាតិប្រឆាំងអំពើពុករលួយ កោតសរសើរ ដោយក្តីគោរពដល់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ និងសេនាធិការដែលជាក្រសួងស្ថាប័ន ទាំងអស់ ជាពិសេសក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ ដែលសកម្មធ្វើជាក្បាលម៉ាស៊ីន រទេះភ្លើងអូសទាញ ចលនាកែទម្រង់ឲ្យស៊ីជម្រៅ និងមុតស្រួច៕ដោយ៖កូឡាប
