ស្ទឹងត្រែង៖ អធិការនគរបាលស្រុកសៀមប៉ាង បានឱ្យដឹងថា អ្នកភូមិ១៧៦គ្រួសារបានតវ៉ារុះរើ និងដុតផ្ទះ១ខ្នងចោល ដោយចោទថាម្ចាស់ផ្ទះនោះចេះអាបធ្មប់ ហើយម្ចាស់ផ្ទះមិនព្រមរុះរើផ្ទះមកចោល តាមកិច្ចសន្យាការងារកន្លងមក បែរជារត់គេចខ្លួនបាត់។
អ្នកភូមិជិត២០០គ្រួសារបានលើកគ្នាទៅរុះរើដុតផ្ទះពលរដ្ឋមួយគ្រួសារបណ្ដាលឱ្យឆេះអស់ទាំងស្រុង ដោយអ្នកភូមិចោទគ្រួសារមួយថាចេះអំពើអាបធ្មប់។ ហេតុការណ៍នោះ កើតឡើងនៅភូមិកែងញៃ ឃុំសេកុង ស្រុកសៀមប៉ាង ខេត្តស្ទឹងត្រែង កាលពីថ្ងៃទី៤ ខែកុម្ភៈ ឆ្នាំ២០២០។
តាមប្រភពព័ត៌មានពីស្រុកសៀមប៉ាង ឱ្យដឹងថា ប្រជាពលរដ្ឋជាច្រើននាក់ បាននាំគ្នាកាន់ពូថៅ កាំបិត ដែកគាស់លើកគ្នាទៅរុះរើផ្ទះមួយខ្នង សង់ពីឈើបាំងក្តារដំបូលប្រក់ដែកស័ង្កសីទំហំទទឹង៦ម៉ែត្រគុណនឹងបណ្តោយ៧ម៉ែត្រ។ អ្នកភូមិចោទថា បុរសឈ្មោះលៀម ប៉ក អាយុ៦៧ឆ្នាំ ក្នុងគ្រួសារមួយនេះ ចេះមន្តអាគមអាបធ្មប់។
អធិការនគរបាលស្រុកសៀមប៉ាង បានឱ្យដឹងថា អ្នកភូមិ១៧៦គ្រួសារ បានតវ៉ារុះរើផ្ទះឈ្មោះ លៀម ប៉ក និងដុតចោល។ នគរបាលបានលើកឡើងថា យោងតាមកំណត់ហេតុសម្របសម្រួល កាលពីថ្ងៃទី២២ ខែមករា ឆ្នាំ២០២០ របស់អាជ្ញាធរឃុំស្រុក ដោយមានការចូលរួម ពីលោកស្រី ផាត់ រ៉ាណា អភិបាលរងស្រុកជាតំណាង ជាមួយឈ្មោះ លៀម ប៉ក និងប្រជាពលរដ្ឋពាក់ព័ន្ធចេះ អំពើអាបធ្មប់។
ឈ្មោះលៀម ប៉ក បានសន្យានៅចំពោះមុខអាជ្ញាធរ និងអ្នកភូមិថា នឹងរុះរើផ្ទះដោយខ្លួនឯង។ អ្នកភូមិបានលើកឡើងថា តែរហូតដល់ថ្ងៃកំណត់ បែរជាគេចខ្លួនបាត់ មិនដឹងថាទៅទីណា ជាមួយភរិយា មិនធ្វើតាមសន្យា ទើបប្រជាពលរដ្ឋ ក្នុងភូមិលើកគ្នារុះរើ និងដុតចោលតែម្តង។ នៅលើផ្ទះនោះ ប្រជាពលរដ្ឋបានប្រទះឃើញចានឆ្នាំង ក្បាលឆក់ត្រី និងកាំភ្លើងច្នៃមួយដើម៕ ដោយ៖បញ្ញាស័ក្តិ
