មនុស្សម្នាក់បានស្លាប់ និង ១៥៧នាក់រងរបួស ក្រោយពេលយន្តហោះដឹកអ្នកដំណើរមួយគ្រឿង បានចុះចត់រអិលធ្លាក់ផ្លូវ នៅព្រលានយន្តហោះប្រទេសតួកគី បណ្តាលឲ្យមានអគ្គិភ័យ និងយន្តហោះបាក់ជា ៣កំណាត់។
មុនពេលកើតហេតុ យន្តហោះ Boeing 737 ដែលប្រតិបត្តិដោយក្រុមហ៊ុនអាកាសចរណ៍តួកគីឈ្មោះ Pegasus Airlines បានធ្វើការហោះហើរចេញពីទីក្រុង Aegean មកកាន់ព្រលានយន្តហោះ Sabiha Gokcen ស្ថិតក្នុងរដ្ឋធានី Istanbul។
យន្តហោះបានរងការបោកបក់យ៉ាងខ្លាំងដោយសារខ្យល់ និងភ្លៀងខ្លាំង។
រដ្ឋមន្រ្តីសុខាភិបាលតួកគីលោក Fahrettin Koca និយាយប្រាប់អ្នកសារព័ត៌មានថា “នៅក្នុងដំណាក់កាលនេះ មនុស្សចំនួន ១៥៧នាក់រងរបួស និងកំពុងស្ថិតនៅមន្ទីរពេទ្យ ហើយពលរដ្ឋយើងម្នាក់បាត់បង់ជីវិត”។
លោកថ្លែងទៀតថា “អ្នកដំណើរខ្លះបានជម្លៀសខ្លួនពួកគេចេញដោយខ្លួនឯង ខណៈអ្នកខ្លះ បានជាប់នៅក្នុងយន្តហោះ និងត្រូវបានក្រុមសង្រ្គោះជួយរំដោះពួកគេចេញ”។
យន្តហោះនោះមានដឹកអ្នកដំណើរចំនួន ១៧១នាក់ និងបុគ្គលិកយន្តហោះចំនួន ៦នាក់។
អាជ្ញាធរតួកគីបានធ្វើការស៊ើបអង្កេតជុំវិញហេតុការណ៍នោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
