ភ្នំពេញ ៖ ជនជាតិឡាវម្នាក់បានជួញដូរគ្រឿងញៀន ប្រភេទមេតំហ្វេតាមីន (ICE)ទម្ងន់៤គីឡូក្រាម ឆ្លងដែនពីប្រទេសឡាវ ចូលមកប្រទេសកម្ពុជា ត្រូវបានកម្លាំងមន្ទីរប្រឆាំងគ្រឿងញៀន ស្រាវជ្រាវរហូតឈានដល់ចាប់ខ្លួន នៅថ្ងៃទី៥ ខែកុម្ភៈ ឆ្នាំ២០២០ នៅចំណុចក្នុងស្ថានីប្រេង PTT (កាហ្វេអាម៉ាហ្សូន) ផ្លូវជាតិ៦អា ស្ថិតក្នុងសង្កាត់ជ្រោយចង្វា ខណ្ឌខណ្ឌជ្រោយចង្វា រាជធានីភ្នំពេញ។
មន្ដ្រីជាន់ខ្ពស់មន្ទីរប្រឆាំងគ្រឿងញៀន បានថ្លែងប្រាប់ឲ្យដឹងនៅព្រឹកថ្ងៃទី៦ ខែកុម្ភៈ ឆ្នាំ២០២០នេះថា ប្រតិបត្តិការនេះ អនុវត្តតាមបញ្ជាដឹកនាំរបស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ដឹកនាំបញ្ជាដោយផ្ទាល់ កម្លាំងជំនាញនៃមន្ទីរប្រឆាំងគ្រឿងញៀន (ក៨) ចុះស្រាវជ្រាវដោយលោកឧត្តមសេនីយ៍ទោ វ៉ាន់ កុសល នាយករងមន្ទីរ និងមានការសម្របសម្រួលដោយលោក ហ៊ឹង ប៊ុនថន ព្រះរាជអាជ្ញារងរាជធានីភ្នំពេញ។
ប្រភពដដែល បានបញ្ជាក់ថា ជាលទ្ធផលនៃប្រតិបត្តិការ កម្លាំងសមត្ថកិច្ចជំនាញចាប់ខ្លួនបានជនជាតិឡាវម្នាក់ ឈ្មោះ សែងច័ន្ទ ដួងចៃ (SENG CHANH DOUANGCHAY) និងចាប់រកវត្ថុតាងបានសារធាតុញៀនមេតំហ្វេតាមីន (ICE) ៤កញ្ចប់ធំ ទម្ងន់៤គីឡូក្រាម។ ក្រោយឃាត់ខ្លួនជនសង្ស័យត្រូវបានបញ្ជូនទៅ មន្ទីរប្រឆាំងគ្រឿងញៀន ដើម្បីចាត់ការបន្ដតាមនីតិវិធី៕ដោយ៖បញ្ញាស័ក្តិ
