បន្ទាយមានជ័យ ៖ គ្រោះថ្នាក់ចរាចណ៍ដ៏គួរឲ្យរន្ធត់មួយបានកើតឡើងដោយរថយន្តដឹកទំនិញបើកទៅបុកម៉ូតូសណ្តោងរ៉ឺម៉ក ហើយទៅបុកម៉ូតូ១គ្រឿងទៀតបណ្តាលឲ្យមនុស្សស្លាប់ដល់ទៅ៣នាក់និង១នាក់របួសធ្ងន់។
ហេតុការណ៍កើតឡើងនៅវេលាម៉ោង១១ព្រឹក ថ្ងៃទី១៤ ខែមករា ឆ្នាំ២០១៨នៅលើកំណាត់ផ្លូវជាតិលេខ ១៥៩ សេ ត្រង់ចំណុចស្ពានព្រែកសំរោង ក្នុងភូមិ ព្រែកសំរោង ឃុំ រហាត់ទឹក ស្រុក មង្គលបូរី ខេត្តបន្ទាយមានជ័យ។
លោកអនុសេនីយ៍ ងួន ភិរម្យ មេបញ្ជាការមូលដ្ឋានកងរាជអាវុធហត្ថស្រុកមង្គលបូរីបានឲ្យដឹងថា ៖ នៅមុនពេលកើតហេតុនោះ មានម៉ូតូម៉ាកហុងដាសេ ១០០ សេរីចាស់ ពណ៌ក្រហម គ្មានស្លាកលេខ អូសរ៉ឺម៉កដឹកស្មៅ អ្នកបើកឈ្មោះ ប៊ុន ធី ប្រុស ៥៤ ឆ្នាំ រស់នៅភូមិល្វា ឃុំ ល្វា ស្រុកបវេល ខេត្តបាត់ដំបង បើកឡើងមកផ្លូវជាតិហើយបានបត់ស្តាំឡើងដល់ថ្នក់ជាតិជ្រុលទៅខាងឆ្វេងរួចបើករ៉បមកខាងស្តាំវិញ។
ស្របពេលនោះក៏មានរថយន្តម៉ាក គា ពណ៌ ស ពាក់ស្លាកលេខ ភ្នំពេញ 3A 3789 អ្នកបើកមិនស្គាល់អត្តសញ្ញាណធ្វើដំណើរតាមបណ្តោយផ្លូវជាតិពីកើតទៅលិចបើកក្នុងល្បឿនលឿន។ លុះបើកមកដល់ចំណុណកើតហេតុ ក៏បុកម៉ូតូសណ្តោងរ៉ើម៉ក ។
ហើយរថយន្តក៏រេចង្កូតទៅខាងឆ្វេងក៏ ជ្រុលទៅបុកនិងម៉ូតូមួយគ្រឿងទៀត ម៉ាកហុងដា សេ១២៥ ផលិតឆ្នាំ២០១៥ ពណ៌ខ្មៅ ពាក់ស្លាកលេខបន្ទាយមានជ័យ ១J ៨៦៣៤ ដែលបើកដោយឈ្មោះ ឆម ឈឿប ភេទ ស្រី អាយុ ៥២ ឆ្នាំ ឌុបកូនស្រី ឈ្មោះ ទៀង ចន្ធូ អាយុ ៣៣ ឆ្នាំ និងចៅស្រី ឈ្មោះ រុំ លីនណា អាយុ ៤ ឆ្នាំ រស់នៅភូមិ ចំណោមកើត ឃុំ ចំណោម ស្រុក មង្គលបូរី ធ្វើដំណើរតាមបណ្តោយផ្លូវជាតិពីលិចទៅកើត ចំពីមុខពេញទំហឹង បណ្តាលឲ្យស្លាប់៣នាក់ ស្រី ២ និងរបួសធ្ងន់១នាក់ ។
អ្នកបើរថយន្ត បានគេចខ្លួនបាត់ ។ចំណែកអ្នករងរបួសធ្ងន់ត្រូវបានប្រជាពលរដ្ឋជួយដឹកទៅកាន់មន្ទីរពេទ្យដើម្បីសង្គ្រោះ។រីឯសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យ។ ឯម៉ូតូ២គ្រឿងនិងរថយន្តត្រូវបានសមត្ថកិច្ចយកទៅរក្សាទុកនៅអធិការដ្ឋានស្រុកមង្គលបូរី រងចាំដោះស្រាយ៕ ដោយ៖ បន្ទាយ
