ភ្នំពេញ ៖នៅថ្ងៃទី ៦ ខែ កុម្ភៈ ឆ្នាំ ២០២០ នេះ ឧត្តមក្រុមប្រឹក្សាពិគ្រោះ និងផ្ដល់យោបល់បានបើកការប្រជុំផ្ដល់យោបល់ លើសេចក្ដីព្រាងច្បាប់ និងផ្លាស់ប្ដូរឈ្មោះ ក្រសួងឧស្សាហកម្ម និងសិប្បកម្ម ទៅជាក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ជាមួយប្រតិភូក្រសួងឧស្សាហកម្ម និងសិប្បកម្ម និងចូលរួមប្រជុំផ្ដល់យោបល់ លើគម្រោងវិនិយោគនៃការសាងសង់រោងចក្រអគ្គិសនីដុតធ្យូងថ្ម ៣គម្រោង គឺគម្រោងមានអនុភាព ៧០០មេហ្គាវ៉ាត់ នៅខេត្តកោះកុង ១គម្រោង និងគម្រោងនៅខេត្តឧត្តរមានជ័យមានអនុភាព ២៦៥ មេហ្គាវ៉ាត រួមទាំងគម្រោងនៅខេត្តសៀមរាបមានទំហំ២៣០ មេហ្គាវ៉ាត់ ។
ដែលកិច្ចប្រជុំនេះប្រព្រឹត្តទៅនៅវិមានសន្តិភាព ទីស្ដីការនាយករដ្ឋមន្ត្រី នៅក្នុងកិច្ចប្រជុំជាមួយក្រសួងឧស្សាហកម្ម និងសិប្បកម្ម ក្នុងនោះលោក វិល្លាម សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ពីគណបក្សខ្មែរក្រោក បានផ្ដល់មតិសំខាន់ចំនួន ២ចំណុចដូចជា ៖
១ ៖ ការបង្កើតឈ្មោះក្រសួងបន្ថែមនេះ វាជាការបន្ថែមសមត្ថកិច្ច ដែលសមត្ថកិច្ចទាំងនោះហាក់ដូចជា ជាន់ជាមួយសមត្ថកិច្ចក្រសួងអប់រំ និងរាជបណ្ឌិត្យសភា ដែលមានលក្ខណៈគ្របលើតួនាទីរបស់បណ្ដាស្ថាប័នរបស់គេផ្សេងទៀត។
២ ៖ វាមានលក្ខណៈមិនត្រឹមត្រូវ ដែលក្រសួង ឧស្សាកម្ម និងសិប្បកម្ម ជាសេនាធិការនៃអនុវិស័យនៃវិស័យសេដ្ឋកិច្ច តែបែរជាក្ដាប់យកអំណាចនៃវិស័យវិទ្យាសាស្ត្រ ដែលជាវិស័យធំមួយ ដូចនេះវិស័យវិទ្យាសាស្ត្រ។
លោកវីល្លាម បានបន្តថា នៅក្នុងកិច្ចប្រជុំជាមួយក្រសួង រ៉ែ និង ថាមពល ខ្ញុំបានចោទសួរ និងផ្ដល់មតិសំខាន់ៗដូចជា ៖
កាលពីប្រជុំកាលពីអំឡុង៤ខែមុន នៅពេលក្រសួងមកធ្វើបទបង្ហាញចំពោះគម្រោង ទិញអគ្គីសនីពីប្រទេសឡាវ ខ្ញុំបានផ្ដល់យោបល់ថាឲ្យប្រើប្រាស់មធ្យោបាយក្នុងស្រុក ដែលមានស្រាប់វាចំណេញជាង ដូចជាធ្យូងថ្មជាដើម តែគ្រានោះរដ្ឋមន្ត្រីថា កម្ពុជាមានធ្យូងថ្មតិច និងខ្ចីណាស់ ហើយទោះខ្ញុំបង្ហាញរបាយការណ៍ថានៅខេត្តឧត្តរមានជ័យ មានធ្យូងថ្មអាចប្រើប្រាស់បានយ៉ាងណាក្ដីក៏ រដ្ឋមន្ត្រីបដិសេធ តែពេលនេះ បែរជាមកលើកគម្រោងឲ្យក្រុមហ៊ុនមួយវិនិយោគធ្យូងថ្ម នៅខេត្តឧត្តរមានជ័យទៅវិញ រឿងអភិវឌ្ឍន៍ខ្ញុំគាំទ្រ តែចំណុចសំខាន់ជាបញ្ហា គឺខ្ញុំមិនយល់ត្រង់ថា បើមានគួរថាមានបើអត់គួរថាអត់ ម្ដេចម្ដងស ម្ដងខ្មៅបែបនេះ។
លោកថា ខ្ញុំផ្ដល់យោបល់ខ្លី ខ្ញុំសាទរចំពោះការអភិវឌ្ឍន៍វិស័យអគ្គិសនី ខ្ញុំរីករាយ តែទន្ទឹមនឹងនោះខ្ញុំសង្ឃឹមថា គ្រប់គម្រោងដែលបានយកមកប្រជុំនេះ គឺពុំមានប៉ះពាល់ដល់អត្ថប្រយោជន៍ដីធ្លី របស់ពលរដ្ឋទេ ប្រសិនជាប៉ះពាល់សុំដោះស្រាយឲ្យបានល្អ។
ចំណុចនេះលោក រដ្ឋមន្ត្រីបានអះអាងថា គម្រោងទាំងនេះជាដីរបស់គេទិញពីពលរដ្ឋអស់ហើយពុំមានផលប៉ះពាល់នោះទេ៕ដោយ៖កូឡាប
