សៀមរាប៖ លោកវរសេនីយ៍ទោ លឹម សម្បត្តិ អធិការដ្ឋាននគរបាលស្រុកប្រាសាទបាគង បានឲ្យដឹងថា ជនសង្ស័យធ្វើសកម្មភាពលួចសត្វគោយ៉ាងសកម្មចំនួន២នាក់ ក្នុងចំណោមបក្ខពួក ៤នាក់ ត្រូវបានកម្លាំងនគរបាលនៃអធិការដ្ឋាននគរបាលស្រុកប្រាសាទបាគងធ្វើការឃាត់ខ្លួនបានហើយ បន្ទាប់ពីធ្វើសកម្មភាពលួចសត្វគោលើកចុងក្រោយ ចំនួន២ក្បាល របស់ប្រជាពលរដ្ឋ រស់នៅភូមិបង្កោង ឃុំឣំពិល ស្រុកប្រាសាទបាគង ខេត្តសៀមរាបកាលពីវេលាម៉ោង១រំលងអធ្រាត្រឈានចូលថ្ងៃទី៦ ខែកុម្ភៈ ឆ្នាំ២០២០នេះ។
លោកវរសេនីយ៍ទោ បានរៀបរាប់ពីដំណើររឿង មុនពេលកើតហេតុកម្លាំងអធិការដ្ឋាននគរបាលស្រុកប្រាសាទបាគង បានធ្វើការល្បាតក្នុងភូមិសាស្ត្រស្រុក ក៏ប្រទះឃើញម៉ូតូសណ្ដោងរ៉ឺម៉កសម្រាប់ដឹកគោមួយគ្រឿង (គ្មានគោ) ដោយមានការសង្ស័យ កម្លាំងយើងបានតាមឃ្លាំមើល និងឃើញអ្នកបើកបររ៉ឺម៉កបានទូរស័ព្ទទាក់ទង ហើយទៅជួបមនុស្សម្នាក់ទៀតជិះម៉ូតូម៉ាកស៊ូម័រឣិច ពណ៌ក្រហម បន្ទាប់មកឃើញមនុស្ស២នាក់ទៀតដឹកគោចំនួន២ក្បាល មករកដាក់រ៉ឺម៉ក ពេលនោះកម្លាំងយើង ក៏ចូលទៅបង្ក្រាបបានម្ចាស់រ៉ឺម៉កម្នាក់។ ចំណែកអ្នកដឹកគោ២នាក់ បានលែងគោចោល ហើយរត់ចូលព្រៃបាត់ រីឯម្នាក់ទៀត ដែលជិះម៉ូតូ បានព្យាយាមគេច ខ្លួន តែត្រូវកម្លាំងនគរបាលយើងបើកឡានដេញតាមចាប់រហូតឃាត់ខ្លួនបានរួមជាមួយម៉ូតូផងដែរ។
ជនសង្ស័យទាំង២នាក់ខាងលើនេះ ទី១/ឈ្មោះសៅ ភ្លឿយ ភេទប្រុស អាយុ៤៤ឆ្នាំ ភូមិត្រាវគៀត ឃុំដានរុន ស្រុកសូទ្រនិគម ខេត្តសៀមរាប។ ទី២/ឈ្មោះ សំ ជា ភេទប្រុស អាយុ៥០ឆ្នាំ ភូមិប៉ាតត ឃុំគោកធ្លកក្រោម ស្រុកជីក្រែង ខេត្តសៀមរាប។
ជនសង្ស័យទាំង០២នាក់នេះ បានសារភាព ថាពួកខ្លួនពិតជា បានធ្វើសកម្មភាពលួចសត្វគោចំនួន២ក្បាលខាងលើ ពិតប្រាកដមែន ដោយមានបក្ខពួក២នាក់ទៀត គឺឈ្មោះ បារាំង និងឈ្មោះ ឌីចូលរួមដែរ តែបានរត់គេចខ្លួនបាត់។ ហើយកន្លងមកពួកគេ បានធ្វើសកម្មភាពលួចគោ នៅក្នុងស្រុកប្រាសាទបាគងចំនួន២លើក នៅស្រុកសូទ្រនិគមចំនួន ៤លើក និងស្រុកជីក្រែងចំនួន១លើកផងដែរ។
យោងតាមការបំភ្លឺ និងពាក្យបណ្តឹង របស់ឈ្មោះ ភ ឈ ភេទប្រុស ឣាយុ៦២ឆ្នាំ រស់នៅភូមិបង្កោង ឃុំឣំពិល ស្រុកប្រាសាទបាគង ខេត្តសៀមរាប បានបំភ្លឺថាគាត់បានចងគោ នៅខាងជើងផ្ទះ លុះប្រហែលម៉ោង៣ស្រាប់តែបាត់គោ ក្រោយមកលឺថាសមត្ថកិច្ចចាប់បានចោរលួចគោ ពេលមកមើលគោនោះ គឺជាគោរបស់គាត់ពិតមែន។
យោងតាមពាក្យបណ្តឹងរបស់ជនរងគ្រោះ និងអនុវត្តតាមការណែនាំរបស់លោកឧត្តសេនីយ៍ទោទិត្យ ណារ៉ុងស្នងការ នៃស្នងការដ្ឋាននគរបាលខេត្តសៀមរាប និងលោកស្នងការរងទទួលផែនការងារព្រហ្មទណ្ឌ ក៏ដូចជាគោលការណ៍ណែនាំរបស់ ប្រធានគណៈបញ្ជាការឯកភាពស្រុកប្រាសាទបាគង ជនសង្ស័យទាំង០២នាក់ខាងលើត្រូវបានកម្លាំងនគរបាលផ្នែកព្រហ្មទណ៍នៃអធិការដ្ឋាននគរបាលស្រុកប្រាសាទបាគង កសាងសំណុំរឿងបញ្ជូនទៅតុលាការដើម្បីចាត់ការតាមនិតិវិធីនៃច្បាប់ ចំណែកសត្វគោទាំង០២ក្បាលដែលដកហូតបានមកវិញ ត្រូវបានធ្វើការប្រគល់ទទួលជូនជនរងគ្រោះរួចរាល់ហើយផងដែរ។
សូមកោតសរសើរនិងអរគុណ ដល់កងកម្លាំង និងបងប្អូន ប្រជាការពារទាំងអស់ ដែលបានចូលរួម អនុវត្តតាមផែនការណ៍ ដែលខ្ញុំប្រគល់ជូន ដើម្បីរួមគ្នា បង្ការទប់ស្កាត់ បទល្មើស ក្នុងមូលដ្ឋាន រក្សាអោយបាននូវ សន្តិសុខ សុវត្ថិភាព និងទ្រព្យសម្បត្តិ ជូនបងប្អូនប្រជាពលរដ្ឋយើង៕ ដោយ៖កូឡាប
