អ្នកស្លាប់ដោយសារវីរុសកូរ៉ូណានៅក្នុងប្រទេសចិន បានកើនឡើងដល់ចំនួន ៦៣៦នាក់នៅថ្ងៃសុក្រនេះ ខណៈដែលចំនួនអ្នកឆ្លងកើនលើស ៣០.០០០នាក់។
ក្នុងរយៈពេលតែមួយថ្ងៃ ចំនួនអ្នកស្លាប់ថ្មីមានរហូតដល់ ៧៣នាក់។ នេះបើតាមការបញ្ជាក់របស់គណៈកម្មាការសុខភាពជាតិរបស់ចិន។
មានករណីឆ្លងថ្មីយ៉ាងតិចចំនួន ៣.១៤៣ ហើយវាធ្វើឲ្យអ្នកឆ្លងសរុបទាំងអស់ក្នុងប្រទេសកើនដល់ ៣១.១៦១ករណី។
នៅក្នុងចំណោមអ្នកឆ្លង មានចំនួន ៤.៨០០នាក់កំពុងស្ថិតក្នុងស្ថានភាពធ្ងន់ធ្ងរ។
សូមបញ្ជាក់ថា អាជ្ញាធរចិនកំពុងតែតស៊ូយ៉ាងខ្លាំងដើម្បីប្រយុទ្ធប្រឆាំងនឹងការរីករាលដាលយ៉ាងលឿន របស់វីរុសមរណៈដែលបានផ្ទុះឡើងកាលពីខែធ្នូ នៅក្នុងខេត្តហូបេ ប្រទេសចិន។
កាលពីពេលថ្មីៗនេះ ចិនបានទទួលយកអ្នកជំនាញអាមេរិច មកប្រទេសរបស់ខ្លួនដើម្បីជួយប្រយុទ្ធប្រឆាំងនឹងវីរុសដ៏កាចសាហាវខាងលើ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia