ភ្នំពេញ៖ អាជ្ញាធររាជធានីភ្នំពេញ គ្រោងនឹងបើកការដ្ឋានស្ថាបនាផ្លូវបេតុងអារម៉េអមសងខាងផ្លូវរថភ្លើងចាប់ពីផ្លូវ២៨៩ រហូតដល់ វិថីវិមានឈ្នះឈ្នះដែលមានប្រវែងជាង ១០ គីឡូម៉ែត្រដើម្បីសម្រួលចរាចរណ៍ជូនប្រជាពលរដ្ឋបានធ្វើដំណើរ និងកាត់បន្ថយនូវការកកស្ទះចរាចរណ៍នៅតាមបណ្ដោយផ្លូវ សហព័ន្ធរុស្ស៊ី ដែលបច្ចប្បន្នកំពុងទទួលរងនូវការកកស្ទះចរាចរណ៍រាល់ថ្ងៃ។
ប្រធានមន្ទីរសាធារណការនិងដឹកជញ្ជូនរាជធានីភ្នំពេញ លោកសាំ ពិសិដ្ឋ បានបញ្ជាក់ឲ្យដឹងក្នុងកិច្ចប្រជុំកិច្ចប្រជុំ ក្រោមវត្តមាន លោកឃួង ស្រេង អភិបាលនៃគណៈអភិបាលរាជធានីភ្នំពេញ កាលពីល្ងាចថ្ងៃទី៧ ខែកុម្ភៈ ឆ្នាំ២០២០នេះថា គម្រោងនៃការស្ថាបនាផ្លូវអមសងខាងផ្លូវរថភ្លើងខាងលើនេះ នឹងធ្វើឡើង ដោយមានទទឹង ៦,៥០ម៉ែត្រទៅ ៧ម៉ែត្រ ដោយទុកចំណែកផ្លូវរថភ្លើងទទឹង ១២ម៉ែត្រ នៅចំកណ្តាល ហើយគ្រោងនេះនឹងចំណាយថវិកាជាង៣៥លានដុល្លារអាមេរិក ដោយសារតែគម្រោងនេះ ត្រូវដាក់លូអមសងខាងផ្លូវ ការធ្វើចិញ្ចើមផ្លូវ ការបំពាក់បង្គោលភ្លើងអគ្គិសនី រួមជាមួយនឹងការចាក់ដីបំពេញបន្ថែមផងដែរ។ ក្នុងចំនួនទឹកប្រាក់នេះ គឺមិនបានគិតពីផលប៉ះពាល់លំនៅឋានប្រជាពលរដ្ឋដែលប៉ះពាល់នៃគម្រោងនេះផងទេ។
លោកប្រធានមន្ទីរ ក៏បានបញ្ជាក់ផងដែរថា គម្រោងនេះ គឺបានឯកភាពពីក្រសួងសាធារណការ និងដឹកជញ្ជូន រួមជាមួយនឹងរដ្ឋបាលរាជធានីភ្នំពេញរួចហើយ ហើយ
រដ្ឋបាលរាជធានីភ្នំពេញនិងធ្វើការស្ថាបនាផ្លូវនេះ នៅតំបន់ណាដែលមិនប៉ះពាល់លំនៅដ្ឋានប្រជាពលរដ្ឋ ហើយគម្រោងនេះដែរ អាចដំណើរការក្នុងពេលដ៏ខ្លីខាងមុខនេះ គឺ គម្រោងនេះនឹងប្រើប្រាស់រយៈពេល ១៦ ខែ ដោយប្រើប្រាស់ថវិកាប្រមាណជាជាង ៣៥ លានដុល្លារសហរដ្ឋអាមេរិក ។ ក្រោយពីការស្ថាបនាហើយ កំណាត់ផ្លូវថ្មីនេះ នឹងកាត់បន្ថយការកកស្ទះចរាចរណ៍ នៅតាមបណ្តោយផ្លូវសហព័ន្ធរុស្ស៊ី បានប្រមាណជា៣០ភាគរយ។
បើតាមការបញ្ជាក់ពីអាជ្ញាធរផែនដីមួយចំនួន បានបញ្ជាក់ឲ្យដឹងថា ផលប៉ះពាល់នៅខាងប្រជាពលរដ្ឋ ទៅលើគម្រោងនេះ គឺបានដោះស្រាយជាបណ្ដើរហើយ ក្នុងនោះសម្រាប់សង្កាត់ទឹកល្អក់ទី១ ខណ្ឌទួលគោក ក្នុងចំណោមប្រជាពលរដ្ឋដែលរងផលប៉ះពាល់ជាង២០០គ្រួសារ ដោយស្រាយស្ទើរតែអស់ទៅហើយ នៅតែចំនួន១២គ្រួសារប៉ុណ្ណោះ។
អភិបាលនៃគណៈអភិបាលរាជធានីភ្នំពេញ លោកឃួង ស្រេង បានក្នុងកិច្ចប្រជុំនោះ បានជំរុញឲ្យអាជ្ញាធរដែនដី និងមន្ទីរពាក់ព័ន្ធ ត្រូវចុះសិក្សាបន្ថែម ដោយលោកបានណែនាំឲ្យលោកអភិបាលរងរាជធានីភ្នំពេញ១រូប ដឹកនាំមន្ទីរសាធារណការ និងដឹកជញ្ជូនរាជធានីភ្នំពេញ នឹងអាជ្ញាធរ ចុះធ្វើការសិក្សាពីផលប៉ះពាល់ ជាបន្ទាន់ ដើម្បីចងក្រងជារបាយការណ៍មួយ ហើយនឹងចុះសហការជាមួយនឹងក្រសួងសាធារណការនិងដឹកជញ្ជូន ចុះពិនិត្យជាក់ស្តែងម្ដងទៀតនៅថ្ងៃទី ១២ ខែកុម្ភៈខាងមុខនេះ៕ដោយ៖កូឡាប
