ខេត្តកណ្ដាល៖ រដ្ឋបាលខេត្តកណ្តាល បានឲ្យដឹងថា មាឃបូជា ជាបុណ្យដ៏ធំមួយ ក្នុងចំណោម បុណ្យសាសនា ដទៃទៀត ដែលបណ្តាប្រទេសក្នុងពិភពលោក កាន់ព្រះពុទ្ធសាសនា តែងតែប្រារព្ធធ្វើឡើងជារៀងរាល់ឆ្នាំ។ នៅទូទាំងព្រះរាជាណាចក្រ កម្ពុជា និយាយរួម និងនិយាយ ដោយឡែក នៅខេត្តកណ្តាល ព្រះសង្ឃ ពុទ្ធបរិស័ទ តែងតែប្រារព្ធពិធីនេះមិនដែលអាក់ខានឡើយ។
ជាក់ស្តែងនៅព្រឹកថ្ងៃទី៨ ខែកុម្ភៈ ឆ្នាំ២០២០ នេះលោក នួន ផា ប្រធានក្រុមប្រឹក្សាខេត្ត និងលោក បណ្ឌិត ម៉ៅ ភិរុណ អភិបាលខេត្តកណ្តាល ថ្នាក់ដឹកនាំ រដ្ឋបាលឯកភាពខេត្ត សមាជិកក្រុមប្រឹក្សាខេត្ត ថ្នាក់ដឹកនាំ មន្ត្រី រាជការ តាមមន្ទីរស្ថាប័នអង្គភាពជុំវិញខេត្ត និងស្រុកពញាឮ រួមជាមួយ មន្រ្តីជាន់ខ្ពស់ តាមឋានានុក្រម របស់ព្រឹទ្ធសភា រដ្ឋសភា រាជរដ្ឋាភិបាល ព្រមទាំង ព្រះសង្ឃ ពុទ្ធបរិស័ទ ជាច្រើននាក់ទៀត បានជួបជុំគ្នាប្រារព្ធ ពិធីបុណ្យមាឃបូជា នៅថ្ងៃសៅរ៍ ១៥កើត ខែមាឃ ឆ្នាំកុរ ឯកសក័ ព.ស២៥៦៣ ត្រូវនិងថ្ងៃទី៨ ខែកុម្ភៈ ឆ្នាំ២០២០។
ពិធីនេះប្រារព្ធធ្វើឡើងនៅភ្នំព្រះរាជទ្រព្យ ស្ថិតនៅស្រុកពញាឮ ខេត្តកណ្តាល ក្រោមការចូលរួមជាអធិបតីពីសំណាក់ លោកស្រីកិត្តិសង្គហ បណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង រដ្ឋសភា ព្រឹទ្ធសភា និងអធិការកិច្ច។
ក្នុងពិធីបុណ្យតាមបែបសាសនាមួយនេះ គណៈកម្មការបុណ្យ បានរៀបចំពិធីដង្ហែរក្បួន មាឃបូជា ដោយមានការ ចូលរួមពីព្រះសង្ឃ មន្ត្រីរាជការ សីលវ័ន សិលវតី ពុទ្ធបរិស័ទ សិស្សានុសិស្សជាច្រើនកុះករ ដោយបាននិមន្ត ព្រះសង្ឃ នមស្សកា ព្រះរតនត្រៃ សមាទានសិល។
បន្ទាប់មកតាមកម្មវិធី ដែលបានគ្រោងទុក លោកស្រីកិត្តិសង្គហ បណ្ឌិត ម៉ែន សំអន និងមន្ត្រីជាន់ខ្ពស់ រួមទាំងថ្នាក់ដឹកនាំខេត្តកណ្តាល ក្រុមប្រឹក្សាខេត្ត ថ្នាក់ដឹកនាំ មន្រ្តីរាជការ ស្ថាប័នជុំវិញខេត្ត និងប្រជាជនជាពុទ្ធបរិស័ទ បាននិមន្តព្រះសង្ឃ ៣០០អង្គ គោចរបិណ្ឌបាត ជាកិច្ចបង្ហើយបុណ្យ។
គួរបញ្ជាក់ថា៖ បុណ្យមាឃបូជា ប្រារព្ធធ្វើឡើង ដើម្បីរំលឹកព្រឹត្តិការណ៍សំខាន់ៗ ៣ របស់ព្រះសម្មាសម្ពុទ្ធ រួមមាន៖
១- ថ្ងៃដែលព្រះសម្មាសម្ពុទ្ធ ទ្រង់ចេញ សាងភ្នួស។
២- ថ្ងៃដែលព្រះសម្មាសម្ពុទ្ធ ទ្រង់ប្រកាស នូវឱវាទបាដិមោក្ខ ហើយបង្កើត
ព្រះពុទ្ធសាសនា ជាអង្គការចាត់តាំងឡើងក្នុងលោក ។
៣- ថ្ងៃដែល ព្រះសម្មាសម្ពុទ្ធ កំណត់ពេលវេលា នៃការយាងចូលព្រះបរិនិព្វាន្ត៕ដោយ៖កូឡាប