ភ្នំពេញ៖ ពាក្យថា ស្ដ្រីបង្វិលចង្ក្រានមិនជុំ ត្រូវបានលុបបំបាត់ ជាពាក្យស្លោក ឬជាទស្សនៈរបស់សង្គមកម្ពុជា តាំងពីអតីតកាល។ ដោយឡែកចំពោះទស្សនៈដូនតាខ្មែរដែលបានលើកឡើងថាស្ដ្រីបង្វិលចង្ក្រានមិនជុំ យើងអាចនិយាយបានថាត្រឹមត្រូវចំពោះសម័យមុន ប៉ុន្ដែមិនអាចនិយាយថាត្រឹមត្រូវទាំងស្រុងចំពោះសម័យនេះបានទេ ឬយើងអាចនិយាយបានថា ទស្សនៈនេះ អាចត្រឹមត្រូវក្នុងករណីខ្លះ តែមិនមែនត្រឹមត្រូវក្នុងន័យសង្គមទាំងមូល ឬជាសកលបានឡើយ។
លោក ស្រីម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនងជាមួយ រដ្ឋសភា ព្រឹទ្ធសភា និងអធិការកិច្ច បានបញ្ជាក់បែប នេះ ក្នុងពិធីវេទិកាផ្សព្វផ្សាយយេនឌ័រ ក្រោមប្រធានបទស្ដ្រីបង្វិលចង្ក្រានមិនជុំនៅមជ្ឈមណ្ឌលកោះពេជ្រ រាជធានី ភ្នំពេញ នៅរសៀលថ្ងៃទី០៩ ខែកុម្ភៈ ឆ្នាំ២០២០ ។
ក្នុងឱកាសនោះលោកស្រី ម៉ែន សំអន បានបញ្ជាក់ថា៖ ទស្សនៈ ដែលបានលើកឡើងថា ស្ដ្រីបង្វិលចង្ក្រានមិនជុំ”អាចគេយល់បានថា សង្គម ខ្មែរយើងមានភាពលំអៀង និងមិនបានឱ្យតម្លៃស្ត្រីស្មើបុរស ហើយមានលក្ខណៈរើសអើងចំពោះស្ដ្រីភេទ។ បុរសមួយចំនួននៅតែចាត់ទុកថាខ្លួនគឺជាមេគ្រួសារធំមានអំណាចលើសលប់នៅក្នុងគ្រួសារ អាចធ្វើអ្វីៗបានតាមតែអំពើចិត្តរបស់ខ្លួន ដោយមិនចាំបាច់ពិភាក្សា សួរយោបល់ពីភរិយាឡើយ ជាពិសេស នៅក្នុងស្ថានភាពដែលស្ដ្រីជាភរិយានៅផ្ទះ ជាមេផ្ទះមិនចេះរកស៊ី និងគ្មានចំណូល។ ស្ថានភាពនេះបានធ្វើឱ្យស្ដ្រីជាច្រើនទទួលរងទុក្ខផ្នែកផ្លូវចិត្ត និងបាត់បង់តម្លៃរបស់ខ្លួន ។លើសពីនេះ ស្ដ្រីខ្លះនៅតែជួបប្រទះ ការប្រើអំពើហិង្សា និងការរំលោភពីសំណាក់បុរសមួយចំនួនផង។បុរសខ្លះយល់ថាការងារដែលស្ដ្រីជាភរិយារបស់ខ្លួនធ្វើនៅផ្ទះជាការងារកំប៉ិកកំប៉ុក មិនមានតម្លៃស្មើនឹងអ្វីដែលខ្លួនរកបាននៅខាងក្រៅផ្ទះទេ។
លោក ស្រម៉ែន សំអន បានបញ្ជាក់ថា៖ កន្លងមកថ្មីៗនេះ ក្នុងកិច្ចប្រជុំប្រចាំឆ្នាំរបស់ក្រុមប្រឹក្សាជាតិ កម្ពុជាដើម្បីស្ត្រី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះ រាជាណា ចក្រកម្ពុជាបានសម្រេចបង្កើត ក្រុមមេធាវីស្ម័គ្រចិត្តសម្ដេចតេជោសែន ដើម្បីបំពេញបន្ថែមការងារផ្លូវ ច្បាប់ ក្នុងគោលបំណងជួយស្ដ្រី និងក្មេងស្រីក្រីក្រ ដែលរងគ្រោះដោយអំពើហិង្សាទាក់ទងនឹងយេនឌ័រ ឱ្យទទួលបាននូវយុត្តិធម៌បានទាន់ពេលវេលា និងប្រកបដោយប្រសិទ្ធិភាព ។ ដូចច្នេះជារួម ការអនុវត្តយុទ្ធសាស្ដ្រ និងគោលនយោបាយ របស់រាជរដ្ឋា ភិ បាលពិតជាបានជំរុញឱ្យស្ថានភាព ជីវភាព ឋានៈ និង តួនាទីរបស់ស្ដ្រីមានភាពកាន់តែប្រសើរឡើងពីមួយ ថ្ងៃទៅមួយថ្ងៃ ៕ ដោយ៖ កូឡាប
