សៀមរាប៖ បន្ទាប់ពីមានគណនេយ្យទំនាក់ទំនងបណ្ដាញសង្គមហ្វេសបុក ឈ្មោះ “Bosavy Chhet” បានបង្ហោះខ្លឹមសារ សូមគោរពជូនលោក ទៀ សីហា អភិបាលខេត្តសៀមរាប ជួយពន្យល់និងដោះស្រាយជូនពលរដ្ឋចំនួន៩គ្រួសារនៅភូមិយាង ឃុំឬស្សីលក ស្រុកជីក្រែងមកនោះ រដ្ឋបាលស្រុកជីក្រែងបានចេញសេចក្ដីបំភ្លឺ។
រដ្ឋបាលស្រុកជីក្រែង នៅថ្ងៃសៅរ៍ទី៨ ខែកុម្ភៈ ឆ្នាំ២០២០បានចេញសេចក្ដីបំភ្លឺ ពីករណីទំនាស់លើដីចំណីផ្លូវរវាងប្រជាពលរដ្ឋចំនួន ៩ គ្រួសារ ដណ្ដើមចង់បានដីចំណីផ្លូវសាធារណៈរបស់រដ្ឋជាប្រយោជន៍ផ្ទាល់ខ្លួន ស្ថិតនៅភូមិយាង ឃុំឬស្សីលក ស្រុកជីក្រែង ខេត្តសៀមរាប។
រដ្ឋបាលស្រុកជីក្រែង មានកិត្តិយសសូមជម្រាបជូនដំណឹង ដល់សាធារណជនជ្រាបថា “មានគណនេយ្យទំនាក់ទំនង បណ្ដាញសង្គមហ្វេសបុក(Facebook) ឈ្មោះ “Bosavy Chhet” បានបង្ហោះខ្លឹមសារពីថា ” សូមគោរពជូនឯកឧត្ដម ទៀ សីហា អភិបាលខេត្តសៀមរាបសូមឯកឧត្ដមមេត្តា ជួយពន្យល់និងដោះស្រាយជូនពលរដ្ឋចំនួន៩គ្រួសារនៅភូមិយាង ឃុំឬស្សីលក ស្រុកជីក្រែង ខេត្តសៀមរាប ករណី លោក ធូ ចន្ថុល អភិបាលរងស្រុកជីក្រែង បង្ខំឲ្យរុះរើផ្ទះគាត់ដោយចោទថា រស់នៅលើដីចំណីផ្លូវរដ្ឋ ស្របពេលផ្លូវនេះបានពង្រីកនិងធ្វើរួចរាល់ព្រមទាំងដាក់ដោយប្រើប្រាស់ហើយ ហេតុអ្វីឲ្យគាត់រុះរើបន្ថែមជាមួយគ្នានោះគេវាស់វែងពួកគាត់បានកាត់ដីចំណីផ្លូវផ្ដល់ជូនរដ្ឋរួចហើយ “។
ចំពោះករណីនេះ រដ្ឋបាលស្រុកសូមធ្វើការបំភ្លឺ ដូចខាងក្រោម៖
១. ចំពោះករណីនេះដំបូងឡើយនៅថ្ងៃទី៣ ខែមិថុនា ឆ្នាំ២០១៩ គម្រោងស្ថាបនាផ្លូវខេត្ត ដែលអនុវត្តគម្រោងដោយក្រសួងសាធារណការ និងដឹកជញ្ជូន និងមាន កងវិស្វកម្មក្រសួងការពារជាតិ ជាអ្នកសាងសង់បានចុះកំណត់យកផ្លូវក្នុងភូមិយាង ឃុំឬស្សីលកនេះ ជាគម្រោងផ្លូវសាងសង់របស់ខេត្ត និងបានបន្តស្ថាបនាជាដំណាក់កាលៗ ហើយក៏កើតមានជាបញ្ហាទំនាស់ប្ដឹងផ្ដល់គ្នា រវាងប្រជាពលរដ្ឋ និងប្រជាពលរដ្ឋផ្ទាល់ក្នុងចំណោម ០៩គ្រួសារក្នុងនោះដែលបានឈ្លោះប្រកែកគ្នា ដណ្ដើមកាន់កាប់ដីចំណីផ្លូវសាធារណៈរបស់រដ្ឋ ដោយសារការរំលោភបំពានរបស់ខ្លួន ធ្វើសំណង់ចូលលើដីចំណីផ្លូវរបស់រដ្ឋ មានប្រវែងប្រមាណជាង ៥០០ម៉ែត្រ មានទំហំ ១៥ម៉ែត្រ និងមានចំណីផ្លូវប្រវែង ៧,៥ម៉ែត្រពីអ័ក្សកណ្ដាល ស្ថិតនៅក្នុងភូមិយាង ឃុំឬស្សីលក ស្រុកជីក្រែង ខេត្តសៀមរាប។
២. រហូតដល់ថ្ងៃទី២០ ខែធ្នូ ឆ្នាំ២០១៩ លោក ធូ ចន្ថុល អភិបាលរង នៃគណៈអភិបាលស្រុកជីក្រែង តំណាង លោក ពៅ ប៊ុនធឿន អភិបាល នៃគណៈអភិបាលស្រុកជីក្រែង បានដឹកនាំក្រុមការងារ ចុះប្រជុំដោះស្រាយផលប៉ះពាល់លើការរំលោភដីចំណីផ្លូវរបស់រដ្ឋ ស្ថិតនៅចំណុចភូមិយាង ឃុំឫស្សីលក ស្រុកជីក្រែង ម្ដងទៀត ជាលទ្ធផលគឺ បានពន្យល់អំពីច្បាប់លិខិតបទដ្ឋានគតិយុត្តនានា ដែលពាក់ព័ន្ធនឹងផ្លូវថ្នល់ និងបានរកឃើញថាប្រជាពលរដ្ឋចំនួន ០៩គ្រួសារនេះបានរស់នៅ និងសាងសង់ផ្ទះលើដីចំណីផ្លូវមុនពេល ដែលរដ្ឋចេញប្លង់រឹង (ប្លង់ចេញដោយគម្រោងអេកូហ្សូន) នោះទៅទៀត ហើយក្រុមការងាររដ្ឋបាលស្រុក ដែលមានការិយាល័យភូមិបាលស្រុក ការិយាល័យសាធារណការ និងដឹកជញ្ជូនស្រុក និងអាជ្ញាធរភូមិយាង ឃុំឫស្សីលក និងប្រជាពលរដ្ឋពលរដ្ឋចំនួន ០៩គ្រួសារដែលបានរស់នៅលើដីចំណីផ្លូវ ក៏បានសហការចុះកំណត់រកអ័ក្សផ្លូវ និងទំហំដីចំណីផ្លូវឲ្យឃើញទាំងអស់គ្នាទៅតាមប្លង់រឹង (ប្លង់ចេញដោយគម្រោងអេកូហ្សូន) ដែលមានស្រាប់ និងបានកំណត់ផ្លូវ១៥ម៉ែត្រ គឺ៧,៥ម៉ែត្រសង្ខាងពីអ័ក្សផ្លូវ និងរកឲ្យឃើញចំណុចអ័ក្សផ្លូវ ៧,៥ម៉ែត្រ នៅត្រង់ណាទៅតាមប្លង់រឹង ដើម្បីជាការស្មើភាពគ្នា និងតម្លាភាពទៅវិញទៅមក ជៀសវាងការចោទប្រកាន់ថាការពង្រីកផ្លូវនេះមានភាពលម្អៀង និងបានស្នើឲ្យលោកស្រីមេឃុំចេញសេចក្ដីជូនដំណឹង ដើម្បីឲ្យប្រជាពលរដ្ឋចំនួន ៩គ្រួសារ ដែលប៉ះពាល់ធ្វើការរុះរើសំណង់ ដែលបានសាងសង់លើដីចំណីផ្លូវ ប្រសិនប្រជាពលរដ្ឋមានការតវ៉ាសូមដាក់ពាក្យបណ្ដឹង មករដ្ឋបាលស្រុកបន្តនីតិវិធី។
ប៉ុន្តែរហូតមកទល់ពេលនេះប្រជាពលរដ្ឋចំនួន ៩គ្រួសារ មិនព្រមអនុវត្តតាមសេចក្ដីជូនដំណឹង របស់រដ្ឋបាលឃុំឬស្សីលក និងមិនបានដាក់ពាក្យបណ្ដឹងតវ៉ាមករដ្ឋបាលស្រុកទេ ថែមទាំងដើរដាក់ពាក្យប្ដឹងទៅដល់សាលាខេត្តសៀមរាបនិង រហូតឈានទៅដល់ការប្ដឹងទៅសារព័ត៌មានទូរទស្សន៍ BTV និងមានការបង្ហោះតាមគណនេយ្យ ទំនាក់ទំនងបណ្ដាញសង្គមហ្វេសបុក (Facebook) ឈ្មោះ “Bosavy Chhet” ដូចមានក្នុងខ្លឹមសារខាងលើ ដោយសារការចុះទៅយកព័ត៌មាន របស់អ្នកសារព័ត៌មាន សូមមេត្តាយកព័ត៌មានឲ្យបានច្បាស់លាស់ មុននឹងចេញផ្សាយព័ត៌មានរបស់ខ្លួន ដែលមិនបានយល់ពីអង្គហេតុ នៃរឿងទំនាស់នេះសិន ជៀសវាងព័ត៌មានមិនមែនជាការពិត កុំទៅតាមការបង្ហាញរបស់ជនឆ្លៀតឱកាសយកចំណេញ ជាផលប្រយោជន៍ផ្ទាល់ខ្លួនតែភាគីម្ខាងៗ និងសូមឲ្យអ្នកសារព័ត៌មានគោរពតាមវិជ្ជាជីវៈរបស់ខ្លួន និងសូមឲ្យយកព័ត៌មានដែលពិតចាំបង្ហោះ និងផ្សព្វផ្សាយឲ្យសាធារណៈជនដឹង ប្រសិនបើចង់ជ្រាបព័ត៌មានច្បាស់លាស់ សូមទៅទំនាក់ទំនងយកព័ត៌មាន នៅអង្គភាពរបស់គេផ្ទាល់ ជៀសវាងការបង្ហោះ និងផ្សព្វផ្សាយព័ត៌មានមិនពិត៕ដោយ៖កូឡាប