ប្រធានាធិបតីបារាំង បានអំពាវនាវឲ្យ UNESCO ទទួលស្គាល់នំប៉័ងបារាំងជាកេរមរតកវប្បធម៌របស់ UNESCO ក្រោយពេលដែលនំ Pizza ល្បីល្បាញរបស់អ៊ីតាលីមានកិត្តិយសត្រូវបានអង្គការនេះទទួលស្គាល់ពីចុងឆ្នាំកន្លងមក។
តាម BBC សម្ព័ន្ធសមាគមធ្វើនំបារាំង កំពុងដំណើរការបញ្ជូនឯកសាទៅកាន់ UNESCO សំដៅឲ្យអង្គការនេះទទួលស្គាល់ជាមរតកវប្បធម៌ពិភពលោក។ យុទ្ធនាការនេះ ទទួលបានការគាំទ្រយ៉ាងពេញទំហឹងពីប្រធានាធិបតីបារាំង Macron ។ លោក Macron លើកឡើងថា ពិភពលោកទាំងមូលហាក់ដូចជា “ច្រណែន” នឹងប្រទេសបារាំង ដែលជាម្ចាស់របស់ប្រភេទនំប៉័ងវែងដ៏ល្បីល្បាញនោះ។
ចំពោះជនជាតិបារាំង នំប៉័ងត្រូវបានចាត់ទុកជាស្នាដៃសិល្បៈមួយ។ ភាពខុសប្លែកគ្នាពីនំ baguette នឹងពិភពលោក ពុំត្រឹមស្ថិតនៅលើឈ្មោះហៅប៉ុណ្ណោះទេ តែវានៅអាស្រ័យលើរូបមន្តផលិត និងវត្ថុធាតុដើម។ លោក Macron ចែករំលែកក្នុងកម្មវិធីវិទ្យុថា ភាពឆ្នើម និងបច្ចេកទេសព្រមទាំងភាពប៉ិនប្រសប់ ក្នុងការផលិតនំប៉័ងបារាំង ចាំបាច់ត្រូវតែថែរក្សា ហេតុនេះវាគប្បីត្រូវបានទទួលស្គាល់ជាមរតកមនុស្សជាតិ។
ផលិតករនំប៉័ងបារាំង ក៏បានបន្លឺសំឡេងលើបរិមាណលើទីផ្សារ តាមមណ្ឌលពាណិជ្ជកម្មនានា កំពុងតែបំផ្លាញតម្លៃវប្បធម៌អាហារ និងនំប៉័ងរបស់បារាំង។
ចាប់ពីឆ្នាំ ១៩៩៣មក បារាំងបានប្រកាសក្រិតច្បាប់ការពារលើនំប៉័ង baguette ប្រពៃណី។ វាអនុញ្ញាតឲ្យប្រើវត្ថុធាតុដើម ៤គឺ៖ ម្សៅមី មេ និងអំបិល ព្រមទាំងទឹកប៉ុណ្ណោះ ក្រៅពីនោះគឺអាស្រ័យលើសង្វាក់ផលិត ដែលចែងក្នុងឧបសម្ព័ន្ធមួយ។
ក្រៅពីនំ Pizza របស់អ៊ីតាលី នោះមុខអាហារ និងវិញ្ញាសារសិល្បៈ ដែលត្រូវបានទទួលស្គាល់ជាកេរមរតកវប្បធម៌របស់ UNESCO នៅមានវិញ្ញាសារ Yoga របស់ឥណ្ឌា ចង្វាក់រាំ Flamenco របស់អេស្ប៉ាញ ចម្រៀង Opera របស់ទីបេត៍ (ចិន) វប្បធម៌ប៊ីយ៉ា (ប៊ែលហ្សិក) និងនំខ្ញី របស់ក្រូអាត៕ អាទិត្យ
