ខេត្តឧត្ដរមានជ័យ៖ នៅរសៀលថ្ងៃទី៩ ខែកុម្ភៈ ឆ្នាំ២០២០នេះ លោកវ៉ាត់ ចំរើន រដ្ឋលេខាធិការក្រសួងទេសចរណ៍ អញ្ជើញជាអធិបតីភាព នៅក្នុងពិធីបិទព្រឹត្តការណ៍ កីឡាទេសចរណ៍អន្លង់វែង លើកទី២
ឆ្នាំ២០២០។ ក្នុងនោះក៏មានការអញ្ជើញចូលរួមពី លោកឌី រ៉ាដូ អភិបាលរង ខេត្តឧត្ដរមានជ័យ អភិបាលស្រុក មន្ទីរពាក់ព័ន្ធ រួមទាំងគណៈប្រតិភូថៃយ៉ាងច្រើនកុះករផងដែរ។
លោក ឌី រ៉ាដូ អភិបាលរងខេត្តឧត្ដរមានជ័យ បានលើកឡើងថា ស្រុកអន្លង់វែង គឺជាទីតាំងប្រវត្តិសាស្ត្រដ៏គួរឲ្យកត់សម្គាល់មួយ បើយោងតាមសៀវភៅ “ប្រវត្តិសាស្ត្រសហគមន៍អន្លង់វែង ៖ តំបន់កាន់កាប់ចុងក្រោយរបស់ចលនាខ្មែរក្រហម” ជាទីតាំងសម្បូរណ៍ ទៅដោយប្រវត្តិសាស្ត្រដ៏សោកសង្រេងជាច្រើនរបស់កម្ពុជា។ បច្ចុប្បន្នអន្លង់វែងត្រូវបានស្គាល់ជាតំបន់តស៊ូចុងក្រោយ របស់ចលនាខ្មែរក្រហម និងបានបន្សល់នូវស្លាកស្នាម នៃការគ្រប់គ្រងរបស់ខ្មែរក្រហម ហើយអតីតកម្មាភិបាលជាច្រើនបន្តរស់នៅក្នុងតំបន់នេះ រហូតមកដល់សព្វថ្ងៃ។
ក្នុងនោះ លោក វ៉ាត់ ចំរើន រដ្ឋលេខាធិការក្រសួងទេសចរណ៍ បានមានប្រសាសន៍ថា សកម្មភាពព្រឹត្តការណ៍ កីឡាទេសចរណ៍អន្លង់វែងនេះ គឺដើម្បីបន្តឹងដល់ចំណងមិត្តភាពរបស់កម្ពុជា-ថៃ ព្រមទាំងជាកាយវិការដ៏ប្រសើរ សម្រាប់ប្រជាជនទាំងពីរ ក្នុងការប្រាស្រ័យទាក់ទងគ្នា ជាពិសេសពង្រឹងវិស័យទេសចរណ៍ សម្រាប់ជាប្រយោជន៍ដល់ប្រទេសនិងប្រជាជនទាំងពីរ។
លោករដ្ឋលេខាធិការ ក៏បានកោតសរសើរ ដល់ក្រុមការងារមន្ទីរទេសចរណ៍ខេត្តឧត្ដរមានជ័យ រដ្ឋបាលស្រុកអន្លង់វែង កងកម្លាំង អង្គភាពពាក់ព័ន្ធ ដែលបានខិតខំផ្តួចផ្តើម រៀបចំព្រឹត្តការណ៍នេះឡើងបានទទួលយ៉ាងជោគជ័យផងដែរ។
គួរបញ្ជាក់ថា ព្រឹត្តិការណ៍ ថ្មើរជើងប្រវត្តិសាស្ត្រអន្លង់វែង មានកីឡាករចូលរួម ចំនួនប្រមាណ ២០៤៤នាក់ (ភាគីថៃចូលរួម ៧៤៤នាក់)៕ ដោយ៖កូឡាប
