ប្រទេសបង់ក្លាដេសបានបោះបង់ចោលគម្រោងទៅជន្លៀសប្រជាជនខ្លួនដែលសេសសល់នៅប្រទេសចិន ដោយសារនាវិកយន្តហោះរបស់ក្រុមហ៊ុនអាកាសចរណ៍ជាតិ Biman បដិសេធមិនព្រមធ្វើកិច្ចការនោះ។
កាលពីសប្តាហ៍មុន បង់ក្លាដេសបានជន្លៀសប្រជាជនខ្លួនចំនួន ៣១២នាក់ ដែលភាគច្រើនជានិស្សិត មកពីចិន និងមានគម្រោងលើកទី ២ទៅដឹកប្រជាជនចំនួន ១៧១នាក់ដែលសេសសល់នៅចិន ប៉ុន្តែត្រូវបាននាវិកយន្តហោះបដិសេធ។
“ពួកយើងមិនអាចយកពួកគេត្រឡប់មកវិញនោះទេ ដោយសារពួកយើងមិនអាចបញ្ជូនជើងហោះហើរទៅបាន”។ នេះជាការបញ្ជាក់របស់រដ្ឋមន្ត្រីការបរទេសបង់ក្លាដេស AK Abdul Momen ប្រាប់អ្នកសារពត៌មានកាលពីថ្ងៃអាទិត្យម្សិលមិញនេះ។
“គ្មាននាវិកណាម្នាក់ចង់ទៅទីនោះទេ។ ចំណែកនាវិកយន្តហោះដែលធ្លាប់ទៅរួច ក៏មិនចង់ទៅទៀតដែរ”។
ប្រជាជនបង់ក្លាដេសដែលបានត្រឡប់មកពីចិន និងនាវិកយន្តហោះ ត្រូវគេដាក់អោយនៅដាច់ដោយឡែកពីគ្នារយៈពេល ១៤ថ្ងៃ។
មន្ត្រីសុខាភិបាលបាននិយាយថា មិនមាននរណាម្នាក់មានវីរុសកូរ៉ូណានោះឡើយ។
សូមបញ្ជាក់ថា រហូតមកដល់ពេលនេះ ចំនួនអ្នកស្លាប់ដោយសារវីរុសកូរ៉ូណា បានកើនឡើងលើស ៩០០នាក់ ខណៈអ្នកឆ្លងមានលើស ៤០.០០០នាក់។ ជាង ៣.៣០០នាក់ បានជាសះស្បើយពីជំងឺដ៏កាចសាហាវនោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
