ការធ្វើតេស្តលើអ្នកដំណើរនៅលើកប៉ាល់ទេសចរណ៍ជប៉ុន បានរកឃើញថាមានមនុស្ស ៦០នាក់បន្ថែមទៀតមានផ្ទុកវីរុសកូរ៉ូណា បណ្តាលឲ្យតួលេខនៃអ្នកនៅលើកប៉ាល់ដែលផ្ទុកវីរុសដ៏កាចសាហាវនោះ កើនឡើងដល់ចំនួន ១៣០នាក់។
អ្នកដំណើរនៅលើកប៉ាល់ ត្រូវបានអាជ្ញាធរជប៉ុនដាក់ឲ្យនៅដាច់ដោយឡែកពីគេ ក្រោយពេលធ្វើដំណើរដល់ទីក្រុងYokohama កាលពីថ្ងៃទី ៣ខែកុម្ភៈនេះ ក្រោយពេលអតីតអ្នកដំណើរម្នាក់ដែលបានចុះនៅទីក្រុងហុងកុង កាលពីខែមុន ត្រូវបានគេរកឃើញថាមានផ្ទុកវីរុស។
មានអ្នកដំណើរ និងបុគ្គលិកនាវាសរុបទាំងអស់ចំនួន ៣.៧០០នាក់ នៅពេលកប៉ាល់ដ៏ធំនោះបានធ្វើដំណើរដល់ឆ្នេរសមុទ្រជប៉ុនកាលពីសប្តាហ៍មុន។
អ្នកដំណើរកប៉ាល់ជាច្រើននាក់ត្រូវបានគេបញ្ជូនទៅកាន់មន្ទីរពេទ្យ និងប្រហែល ៣.៦០០នាក់ទៀត ដែលភាគច្រើនជាមនុស្សវ័យចំណាស់ កំពុងតែស្ថិតនៅលើកប៉ាល់កាលពីថ្ងៃអាទិត្យម្សិលមិញនេះ។
ក្នុងចំណោមអ្នកដំណើរទាំងអស់ អាជ្ញាធរជប៉ុនបានយកសំណាកអ្នកដំណើរជាង ២០០នាក់ប៉ុណ្ណោះដើម្បីធ្វើតេស្តរកវីរុស ប៉ុន្តែគេមិនទាន់ដឹងច្បាស់ថា អាជ្ញាធរនឹងធ្វើការពិនិត្យលើមនុស្សទាំងអស់ឬយ៉ាងណានោះទេ។
អ្នកដំណើរទាំងអស់ ត្រូវបានគេស្នើឲ្យបន្តស្នាក់នៅក្នុងបន្ទប់ពួកគេ ដើម្បីការពារកុំឲ្យមានការឆ្លងវីរុសថ្មីបន្ថែមទៀត។
សូមបញ្ជាក់ថា តួលេខចុងក្រោយនៃអ្នកស្លាប់ដោយសារវីរុសដ៏កាចសាហាវនោះ បានកើនឡើងលើស ៩០០នាក់ ខណៈអ្នកឆ្លងមានលើស ៤០.០០០នាក់។ មានការព្យាបាលសះស្បើយលើមនុស្សលើស ៣.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
