ក្រុមអ្នកជំនាញពេទ្យជាន់ខ្ពស់របស់អង្គការសុខភាពពិភពលោក (WHO) បានធ្វើដំណើរទៅដល់ប្រទេសចិន កាលពីថ្ងៃចន្ទម្សិលមិញនេះ ដើម្បីធ្វើការស៊ើបអង្កេតលើការផ្ទុះវីរុសកូរ៉ូណា។ នេះជាការបញ្ជាក់របស់ប្រធាន WHO លោក Tedros Adhanom Ghebreyesus ពីទីក្រុងហ្សឺណែវ។
លោក Tedros ដែលបានធ្វើដំណើរទៅកាន់ទីក្រុងប៉េកាំង ដើម្បីពិភាក្សាជាមួយនឹងប្រធានាធិបតីចិន ស៊ី ជីនពីង និងរដ្ឋមន្រ្តីចិនជាច្រើន បានត្រឡប់មកវិញជាមួយនឹងកិច្ចព្រមព្រៀង ដោយធ្វើការបញ្ជូនបេសកកម្មអន្តរជាតិទៅកាន់ចិន។ វាត្រូវការរយៈពេលជិត ២សប្តាហ៍ដើម្បីទទួលបានភ្លៀងខៀវពីរដ្ឋាភិបាលចិន ក្នុងការបញ្ជូនអ្នកជំនាញពេទ្យទៅជួយ។
អ្នកជំនាញពេទ្យរបស់ WHO ដែលបានទៅជួយចិនមានជាង ១០នាក់។
លោក Tedros បានសម្តែងការព្រួយបារម្ភ ចំណោះការរីករាលដាលដ៏លឿនរបស់វីរុសកូរ៉ូណា ហើយលោកបានជំរុញឲ្យប្រទេសទាំងអស់ចាត់វិធានការសុខភាពសាធារណៈ ដើម្បីជួយការពារកុំឲ្យវារីករាលដាលធំឡើង។
លោកថ្លែងថា “សារនេះគឺសម្រាប់ប្រទេសទាំងអស់។ នេះគឺជាសត្រូវរបស់ពួកយើង ហើយយើងអាចយកឈ្នះវាបានប្រសិនជាពួកយើងធ្វើវាស្រុះគ្នា”។
សូមបញ្ជាក់ថា ចំនួនអ្នកស្លាប់ដោយសារវីរុសកូរ៉ូណាទូទាំងពិភពលោក បានកើនឡើងដល់ ១.០១៨នាក់នៅថ្ងៃអង្គារនេះ ខណៈអ្នកឆ្លងមានជាង ៤៣.០០០នាក់។ អ្នកទទួលបានការព្យាបាលសះស្បើយមានចំនួនជាង ៤.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia