តាកែវ៖ថ្លែងក្នុងការចុះចែកអំណោយដល់គ្រួសារ ដែលរងគ្រោះដោយសារអគ្គិភ័យឆាបឆេះផ្ទះចំនួន ៣ខ្នងនារសៀលថ្ងៃទី ១១ ខែកុម្ភៈ ឆ្នាំ២០២០ នៅភូមិចក សង្កាត់រកាក្នុង ក្រុងដូនកែវ ខេត្តតាកែ លោក អ៊ូច ភា អភិបាលខេត្ត និងជាប្រធានកិត្តិយសសាខាកាកបាទក្រហមខេត្តតាកែវ បានធ្វើការអំពាវដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ លើការប្រើប្រាស់ប្រព័ន្ធអគ្គិសនី មុនធ្វើដំណើរចេញទៅណាមកណាក្រៅផ្ទះ យើងត្រូវពិនិត្យមើលឲ្យបានគ្រប់ជ្រុងជ្រោយ ។
ជាពិសេសការដោតដុយបញ្ចូលថ្មទូរស័ព្ទជាប់និងហ្រ្វីភ្លើង ដោយមិនបានបិទប៉ារែតនេះ ដែលជាហេតុធ្វើឲ្យមានការផ្ទុះសេខ្សែភ្លើងបង្កជាអគ្គិភ័យឆាបឆេះផ្ទះសម្បែង ធ្វើឲ្យមានការខាតបង់នៅទ្រព្យសម្បត្តិរបស់បងប្អូន ដូច្នេះដើម្បីជៀសវាងការកើតមាននូវអគ្គិភ័យនេះដែរ យើងត្រូវតែមានការប្រុងប្រយ័ត្នខ្ពស់ ពីព្រោះទ្រព្យសម្បត្តិដែលជាញើសឈាមរបស់យើងនោះ គឺជាផ្ទះសម្បែងរបស់យើងនេះហើយ មិនត្រូវមានការឆ្វេសប្រហែសឡើយ ។
ជាមួយនិងការអំពាវនាវនេះដែរ លោកអភិបាលខេត្តតាកែវ ក៏បានចូលរួមនូវការសោកស្តាយ ចំពោះការខាតបង់នៅទ្រព្យសម្បត្តិ របស់បងប្អូនប្រជាពលរដ្ឋនេះដែរ ហើយក៏បានជំរុញឲ្យអាជ្ញាធរក្រុងធ្វើការពិនិត្យ ទៅលើទីតាំងមួយចំនួននៅក្នុងសង្កាត់ ភូមិ លើហេដ្ឋារចនាសម្ព័ន្ធផ្លូវថ្នល់ក្នុងភូមិ មួយចំនួន គួរមានសភាពធំទូលាយ មិនត្រូវទុកឲ្យមានសភាពតូចចង្អៀតដូចក្នុងករណីភ្លើងឆេះអគ្គិភ័យនេះ ធ្វើឲ្យឡានទឹកចូលមិនចុះដោយសារតែស្ថានភាពផ្លូវ នៅពេលជួបបញ្ហាម្តងៗ ។
សូមបញ្ជាក់ផងដែរថា គ្រួសារដែលរងគ្រោះដោយសារអគ្គិភ័យឆាបឆេះនៅព្រឹកមិញនេះ គឺក្នុងមួយគ្រួសារទទួលបានអំណោយអង្ករ ២៥គីឡូក្រាម មុង ភួយ តង់ កន្ទេល សារុង និងថិវការ៩០ម៉ឺនរៀល ៕ដោយ៖តាកែវ
