មណ្ឌលគិរី៖ សមត្ថកិច្ចស្រុកកែវសីមា ឱ្យដឹងថា ពលរដ្ឋប្រទះឃើញបុរសពោះម៉ាយម្នាក់ដេកស្លាប់ ក្នុងចំការស្វាយចន្ទី នៅវេលាម៉ោង០៧ និង១៥ នាទីព្រឹកថ្ងៃទី១១ ខែកុម្ភៈ ឆ្នាំ២០២០ ស្ថិតនៅភូមិ អូរអាម ឃុំស្រែខ្ទុម ស្រុកែវសីមា ខេត្ត មណ្ឌលគិរី។
ជនរងគ្រោះឈ្មោះ ខាវ បាវ អាយុ ៤២ ឆ្នាំ ជនជាតិដើមភាគតិចស្ទៀង ជាបុរសពោះម៉ាយ មានស្រុកកំណើតភូមិ អូរអាម ឃុំស្រែខ្ទុម ស្រុក កែវសីមា ខេត្តមណ្ឌលគិរី។
យោងតាមការស្រាវជ្រាវនិងការឆ្លើយបំភ្លឺ ពីសាច់ញាតិ និងពលរដ្ឋជិតខាង បានប្រាប់សមត្ថកិច្ចថា បុរសពោះម៉ាយខាងលើនេះ កាលនៅរស់ជាមនុស្សផឹកស្រាស្រវឹងរាល់ថ្ងៃមិនពិសាបាយ មុនពេលស្លាប់គេឃើញគាត់អង្គុយផឹកស្រាម្នាក់ឯង នៅម៉ោងប្រហែលជា ៩យប់ថ្ងៃទី១០ ខែកុម្ភៈ ឆ្នាំ២០២០ លុះព្រឹកឡើងម៉ោងប្រមាណ០៧ និង៤៨នាទីថ្ងៃទី១១ ខែកុម្ភៈ ឆ្នាំ២០២០ គេមិនឃើញបុរសពោះម៉ាយរូបនេះ ក្រោកឡើងដូចរាល់ដងទេ ក៏មានអ្នកជិតខាងទៅដាស់ទើបដឹងថាគាត់ស្លាប់បាត់ទៅហើយ។
ក្រោយពីកម្លាំងជំនាញចុះពិនិត្យ និងធ្វើកោសល្យវិច័យលើសាកសព គឺពុំមានឃើញស្លាកស្នាមអ្វីនោះទេ កម្លាំងជំនាញ និងសាច់ញាតិបងប្អូនសព បានសន្និដ្ឋានថា សពបុរសខាងលើនេះ ពិតជាស្លាប់ដោយសារខ្យល់គរពិតប្រាកដមែន គឺពុំមានការជាប់ពាក់ព័ន្ធក្នុងករណីឃាតកម្មអ្វីឡើយ។
បច្ចុប្បន្ន សពបុរសរូបនេះ ត្រូវកម្លាំងជំនាញបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕ដោយ៖ដែនសីមា