ខេត្តព្រះសីហនុ៖ សមត្ថកិច្ចនគរបាលស្រុកកំពង់សីលា បានឲ្យដឹងថា មនុស្សម្នាក់បានស្លាប់ និង៣នាក់ទៀតរងរបួស ដោយគ្រោះថ្នាក់ចរាចរណ៍រវាងម៉ូតូ និងម៉ូតូ វេលាម៉ោងជិត ១២ថ្ងៃត្រង់ ថ្ងៃទី១១ ខែកុម្ភៈ ឆ្នាំ២០២០។
សមត្ថកិច្ចបន្តថា គ្រោះថ្នាក់ចរាចរណ៍នេះ កើតឡើងនៅចន្លោះគីឡូម៉ែត្រ១២៧-១២៨ ស្ថិតក្នុងភូមិវាល ឃុំកំពង់សីលា ស្រុកកំពង់សីលា ខេត្តព្រះសីហនុ ដោយម៉ូតូទាំងពីរគ្រឿងបើកបរក្នុងទិសដៅស្របគ្នា(ភ្នំពេញ-ព្រះសីហនុ)។
ម៉ូតូទាំងពីរគ្រឿងមានម៉ាក៖ ១- ម៉ូតូម៉ាក ឌ្រីមសង់ ពណ៌ខ្មៅ ពាក់ផ្លាកលេខ កំពត 1D-4730 បើកបរដោយឈ្មោះ ដុក សៅ ភេទស្រី អាយុ២៥ឆ្នាំ រងរបួសស្រាល និងអ្នករួមដំណើរម្នាក់ឈ្មោះ ដុក ចាន់ធី ភេទស្រី អាយុ៣៥ឆ្នាំ របួសធ្ងន់ ក្រោយមកបានស្លាប់ ពេលបញ្ជូនមកមណ្ឌលសុខភាពតក្កវិទ។ ស្ត្រីរងគ្រោះ មានទីលំនៅភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ។ ២- ម៉ូតូម៉ាកយ៉ាម៉ាហា អឹមស្លាស់ ពណ៌ទឹកប៊ិចផ្លាកលេខ ភ្នំពេញ 1GM-4248 បើកបរដោយឈ្មោះ គង់ ភា ភេទប្រុស អាយុ២៩ឆ្នាំ និងអ្នករួមដំណើរម្នាក់ឈ្មោះ សន ស្រីអូន ភេទស្រី អាយុ២៤ឆ្នាំ
រងរបួសស្រាល មានទីលំនៅភូមិធ្មៀ ឃុំសំរោង ស្រុកត្រាំកក់ ខេត្តតាកែវ។
បច្ចុប្បន្នម៉ូតូទាំងពីរគ្រឿងខាងលើនេះ ត្រូវបានសមត្ថកិច្ចនាំយកមករក្សាទុកនៅ អធិការដ្ឋាននគរបាលស្រុកកំពង់សីលា ដើម្បីរង់ចាំរកដំណោះស្រាយនៅពេលក្រោយ៕ដោយ៖ដែនសីមា