ខេត្តព្រះសីហនុ៖ អ្នកនាំពាក្យសាលាខេត្តព្រះសីហនុ លោក ឃាង ភារម្យ បានថ្លែងនៅរសៀលថ្ងៃអង្គារ ទី១១ ខែកុម្ភៈនេះថា តាមលទ្ធផលពិនិត្យសំណាក របស់វិទ្យាស្ថានប៉ាស្ទ័រកម្ពុជា ទៅអ្នកជំងឺជនជាតិហូឡង់ម្នាក់ ដែលមានអាការក្តៅខ្លួនខ្លាំង លទ្ធផលឆ្លើយថា ជនជាតិហូឡង់ រូបនេះ មិនមានឆ្លងវីរុសកូរ៉ូណានោះទេ។
កាលពីថ្ងៃទី១០ ខែកុម្ភៈ តាមរយៈកប៉ាល់ដំណើរកម្សាន្តបរទេសមួយគ្រឿង ដែលចូលចតនៅកំពង់ផែខេត្តព្រះសីហនុ មានជនជាតិហូឡង់ម្នាក់ មានអាការក្តៅខ្លួនខ្លាំង ហើយត្រូវអាជ្ញាធរខេត្តព្រះសីហនុ បាននាំយកទៅពិនិត្យព្យាបាលនៅមន្ទីរពេទ្យបង្អែកខេត្តព្រះសីហនុ និងបានយកសំណាក ជនជាតិហូឡង់រូបនេះ ទៅពិនិត្យនៅវិទ្យាស្ថានប៉ាស្ទ័រកម្ពុជា ដើម្បីឲ្យដឹងប្រាកដថា ជនជាតិហូឡង់រូបនោះ មានឆ្លងវីរ៉ុសកូរ៉ូណាដែរឬទេ?
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា ប្រសិនបើរកឃើញថា មានមនុស្សណាម្នាក់ កើតជំងឺវីរុសកូរ៉ូណា នៅប្រទេសណាមួយ គឺប្រទេសនោះ ទទួលខុសត្រូវលើការព្យាបាលអ្នកជំងឺនោះ រហូតដល់បានជាសះស្បើយ ទើបអនុញ្ញាតឲ្យវិលត្រឡប់ទៅប្រទេសដើមវិញ។
យ៉ាងណាក៏ដោយចុះ ចំពោះជនជាតិហូឡង់ម្នាក់ ដែលមានអាការក្តៅខ្លួនខ្លាំង និងសង្ស័យអាចឆ្លងវីរុសកូរ៉ូណានោះ ត្រូវបានវិទ្យាស្ថានប៉ាស្ទ័រ ប្រកាសលទ្ធផលហើយ គឺមិនមានវីរុសកូរ៉ូណានោះទេ។
លោក ឃាង ភារម្យ អ្នកនាំពាក្យសាលាខេត្តព្រះសីហនុ បញ្ជាក់ថា ករណីជនជាតិហូឡង់ ឈ្មោះ Van Der Meer ភេទប្រុស អាយុ ៧០ឆ្នាំ កាន់លិខិតឆ្លងដែនលេខ NT6L4CK63 ដែលធ្វើដំណើរតាមនាវាទេសចរណ៍ NORWEGIAN JADE សញ្ជាតិ BAHAMAS បានចូលចតនៅកំពង់ផែស្វយ័តក្រុងព្រះសីហនុ កាលពីព្រឹកថ្ងៃទី១០ ខែកុម្ភៈ ឆ្នាំ២០២០ ដោយសារលោក Van Der Meer មានអាការក្តៅខ្លួនទើបត្រូវបានបញ្ជូនមកពិនិត្យព្យាបាល នៅមន្ទីរពេទ្យបង្អែកខេត្តព្រះសីហនុ។
តាមការបញ្ជាក់ របស់ក្រុមគ្រូពេទ្យថា អ្នកជំងឺមានអាការឡើងសម្ពាធឈាម តែកំដៅបានចុះមកធម្មតាវិញហើយ ក្នុងនោះក្រុមគ្រូពេទ្យក៏បានយកសំណាក របស់អ្នកជំងឺទៅធ្វើតេស្តនៅវិទ្យាស្ថានប៉ាស្ទ័រផងដែរ ជាលទ្ធផលនៅរសៀលថ្ងៃទី១១ ខែកុម្ភៈ ឆ្នាំ២០២០នេះ បញ្ជាក់ថា លោក Van Der Meer មិនមានផ្ទុកវីរុសកូរ៉ូណាថ្មី (2019-nCoV)នោះទេ។ ហើយថា ពេលនះក្រុមគ្រូពេទ្យនៃមន្ទីរពេទ្យបង្អែកខេត្តព្រះសីហនុ កំពុងរៀបចំបែបបទអនុញ្ញាតឱ្យលោក Van Der Meer ចាកចេញពីមន្ទីរពេទ្យហើយ៕ ដោយ៖ ដែន សីមា