ភ្នំពេញ ៖ប្រជាពលរដ្ឋ៧៧គ្រួសារ បានឡើងមកតវ៉ានៅទីស្តីការក្រសួងរៀបចំដែនដី នៅថ្ងៃទី១១ ខែកុម្ភៈ ឆ្នាំ២០២០នេះ ដោយស្នើឲ្យជួយដោះស្រាយដីធ្លី ក្នុងតំបន់វិនិយោគរបស់ក្រុមហ៊ុន UNION DEVELOPMENT GROUP Co.,Ltd ដោយស្នើសុំដីស្រែបន្ថែមចំនួន១ហិកតា ក្នុង១គ្រួសារ។
ក្រសួងរៀបចំដែនដី នគរូបនីយកម្ម និងសំណង់ សម្រេចពុំទទួលដោះស្រាយសំណើរបស់ប្រជាពលរដ្ឋ៧៧គ្រួសារ នៅឃុំតានូន ស្រុកបូទុមសាគរ ខេត្តកោះកុងទេ ករណីស្នើសុំដី១ហិកតាបន្ថែមទៀត ព្រោះប្រជាពលរដ្ឋទាំងនោះ ធ្លាប់ទទួលបានការដោះស្រាយរួចហើយ
បើតាមសេចក្តីប្រកាសព័ត៌មាននៅថ្ងៃទី១១ ខែកុម្ភៈ ឆ្នាំ២០២០នេះ ក្រសួងរៀបចំដែនដី បញ្ជាក់ មានប្រជាពលរដ្ឋ៧៧គ្រួសារ មកតវ៉ានៅទីស្តីការក្រសួង នៅថ្ងៃទី១១ ខែកុម្ភៈ ឆ្នាំ២០២០នេះ ដោយស្នើឲ្យក្រសួងជួយដោះស្រាយដីធ្លី ក្នុងតំបន់វិនិយោគរបស់ក្រុមហ៊ុន UNION DEVELOPMENT GROUP Co.,Ltd ដោយស្នើសុំដីស្រែបន្ថែមចំនួន១ហិកតា ក្នុង១គ្រួសារ។
ក្រសួងរៀបចំដែនដី បានពិនិត្យឃើញថា ប្រជាពលរដ្ឋខាងលើ បានទទួលការដោះស្រាយរួចរាល់ហើយ ពីគណៈកម្មការអន្តរក្រសួង ដោយក្នុង១គ្រួសារទទួលបាននូវ៖ ដីលំនៅដ្ឋានទំហំ៥០ម៉ែត្រគុណ១០០ម៉ែត្រ ។ ដីចម្ការទំហំចាប់ពី១ហិកតាដល់៦ហិកតា ទៅតាមទំហំដីធំ ឬតូច ដែលពួកគាត់ធ្លាប់បានកាន់កាប់ ។ ផ្ទះឈើមួយខ្នង និងថវិកាពី៣៥០ដុល្លារ ដល់ ១ម៉ឺនដុល្លារ ទៅតាមទំហំដីធំឬតូច ដែលពួកគាត់ធ្លាប់បានកាន់កាប់ ដូច្នេះក្រសួងពុំទទួលយកការដោះស្រាយនោះទេ ៕ ដោយ៖កូឡាប
