ភ្នំពេញ៖ លោកវិល្លាមប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សានិងពិគ្រោះយោបល់ នៅថ្ងៃទី១១ខែកុម្ភៈបានថ្លែងសារលើហ្វេសប៊ុកថា កុំអាលសួររឿងឃាតកម្មថ្មីៗកើតថ្មីៗនេះថាចាប់បានឬនៅ
សួរថាករណីចោប្លន់ធនាគាជាង២ឆ្នាំហើយតើចាប់បានហើយឬនៅ។
លោក បានបន្ថែមថា ថ្មីៗ នេះមានករណី ឃាតកម្មបាញ់សម្លាប់ឆៅៗមួយចំនួនបានកើតឡើងនៅកណ្ដាលទីក្រុងភ្នំពេញ តែមកដល់ឥឡូវហាក់បីដូចជាចាប់ឃាតករមិនទាន់បាននៅឡើយ។
លោកវិល្លាម បានបញ្ជាក់ថា “ត្រង់ចំណុចនេះខ្ញុំវាយតម្លៃថា ទីក្រុងភ្នំពេញ «មានការធានាសន្តិសុខសង្គមខ្សោយ» បានន័យថាមិនមែនប្រទេសយើងមិនសុវត្តិភាពនោះទេ តែអាជ្ញាធរទេដែលអសមត្ថភាព ។ ព្រោះប្រទេសណាក៏ដោយ ក៏ប្រមូលផ្ដុំដោយពលរដ្ឋមានគ្រប់ចរឹត ឬកពា តាមបរិបទរៀងៗខ្លួន ឯជនកាចសាហាវ ឈ្លើយកោងកាច កាប់ចាក់ ប្លន់បាញ់បោះ ប្រទេសណាក៏មានដែរ ប៉ុន្តែ គេមានវិធានការបង្ក្រាបបានល្អ ឈានដល់មានវិធានការទប់ស្កាត់បានប្រសើរទៀតផង “។
ត្រឡប់មកវិញ ករណីឃាតកម្ម ដែលបាញ់សម្លាប់មនុស្សឆៅៗថ្មីៗនេះ ហាក់ដូចជាស្ងាត់ឈឹង បានត្រឹមតែដឹងតម្រុយតែចាប់មិនបាន។ ទោះករណីឃាតកម្មទាំងនេះទើបកើតឡើងមិនដល់មួយខែក៏ដោយ ក្រែងលោសមត្ថកិច្ចមិនទាន់មានពេលគ្រប់ធ្វើការក៏មហាជនពិបាកជឿទុកចិត្តចំពោះភាពរហ័សរហួនរបស់អាជ្ញាធរសមត្ថកិច្ចក្នុងការចាប់ជនល្មើសដែរ ព្រោះ កាលពីអំឡុង ថ្ងៃទី២៣ ខែសីហា ឆ្នាំ២០១៨ មានករណីប្លន់ធនាគារមួយនៅជិតសាលាវ៉ាន់ដា ដែលបច្ចុប្បន្នអាចនិយាយបានថាប្រហែលជនល្មើស ប្លន់បានលុយផឹកស៊ីកើតថ្លើមងាប់អស់ហើយមើលទៅ ទើបសមត្ថកិច្ចរកមិនឃើញ ចាប់មិនទាន់បាន។
សូមបញ្ជាក់ថា មានការភ្ញាក់ផ្អើលទាំងកណ្តាលថ្ងៃ ថ្ងៃទី២៣ ខែសីហា ឆ្នាំ២០១៨ ដោយមានការអះអាងថា ក្រុមចោរមួយក្រុមមានគ្នា៥នាក់ ប្រដាប់ដោយកាំភ្លើង២ដើម បានចូលប្លន់ធានាគារ RHB Indochina Bank (អ អេច ឥណ្ឌូឆៃណា) ស្ថិតនៅតាមបណ្តោយផ្លូវម៉ៅសេទុង ទាំងកណ្តាល ក្នុងសង្កាត់ទំនុបទឹក ខណ្ឌចំការមន យកលុយរាប់សិបម៉ឺនដុល្លារ គេចខ្លួនបាត់អស់។ នេះបើយោងតាមការបញ្ជាក់ពីមន្ត្រីនគរបាលជាន់ខ្ពស់ ដែលចុះមកទៅកន្លែងកើតហេតុប្រាប់បណ្តាញព័ត៌មាន។
ប្រធាននាយកដ្ឋាននគរបាលព្រហ្មទណ្ឌ លោកឧត្តមសេនីយ៍ឯក ង៉េង ជួ បានថ្លែងប្រាប់បណ្ដាញព័ត៌មានឲ្យដឹងថា ករណីចោរប្លន់ធនាគារឥណ្ឌូឆាយណា នៅបណ្ដោយផ្លូវម៉ៅសេទុង ខណ្ឌចំការមន រាជធានីភ្នំពេញ កម្លាំងសមត្ថកិច្ចជំនាញ កំពុងតែបើកការស្រាវជ្រាវយ៉ាងយកចិត្តទុកដាក់ ដើម្បីកំណត់មុខសញ្ញាក្រុមចោរប្រដាប់អាវុធទាំងនេះ។
លោកឧត្តមសេនីយ៍ប្រធាននាយកដ្ឋាន ដែលបានចុះទៅដឹកនាំបញ្ជាផ្ទាល់នៅកន្លែងកើតហេតុ បានបញ្ជាក់ថា ប្រតិបត្តិការស្រាវជ្រាវនេះ ដោយកម្លាំងនាយកដ្ឋាននគរបាលព្រហ្មទណ្ឌ សហការជាមួយកម្លាំងនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ ក្រោមការបញ្ជាពី នាយឧត្តមសេនីយ៍ អគ្គស្នងការរង និងជាស្នងការនគរបាលរាជធានីភ្នំពេញ។
ប្រធាននាយកដ្ឋានរូបនេះ បានថ្លែងថា «នៅពេលនេះកម្លាំងនគរបាលជំនាញ កំពុងបើកការស្រាវជ្រាវ និងស៊ើបអង្កេតយ៉ាងយកចិត្ដទុកជាបន្ទាន់ លើករណីក្រុមចោរប្រដាប់អាវុធដែលប្លន់ធនាគារនេះ»។
យ៉ាងណាក៏ដោយ លោកឧត្តមសេនីយ៍ឯក ង៉េង ជួ មិនទាន់អាចបញ្ជាក់អំពីអត្ដសញ្ញាណក្រុមជនសង្ស័យនៅឡើយទេ ដោយគ្រាន់តែបញ្ជាក់ថា ក្រុមចោរជាជនជាតិខ្មែរ មិនមែនបរទេសឡើយ ហើយជំហ៊ានដំបូងនេះ អាចមានគ្នា៥នាក់ ជិះម៉ូតូ២គ្រឿង និងប្រដាប់ដោយអាវុធខ្លី។
បើតាមសេចក្ដីរាយការណ៍ពីកន្លែងកើតហេតុ បានរាយការណ៍ថា មុនដំបូងក្រុមចោរបានធ្វើសកម្មភាពភ្ជង់សន្ដិសុខនៅមុខក្រោយ ហើយបក្ខពួកផ្សេងទៀត បានចូលទៅក្នុងធនាគារ ដើម្បីធ្វើសកម្មភាពប្លន់យកលុយ រួចគេចចេញពីកន្លែងកើតហេតុភ្លាមៗ៕ដោយ៖កូឡាប
