មនុស្សចំនួន ៣៩នាក់បន្ថែមទៀតដែលនៅលើនាវាទេសចរណ៍ Diamond Princess មានផ្ទុកវីរុស COVID-19ដែលធ្វើឲ្យតួលេខសរុបនៃអ្នកផ្ទុកវីរុស នៅលើនាវាកើនដល់ចំនួន ១៧៤នាក់។ នេះជាការបញ្ជាក់របស់អាជ្ញាធរជប៉ុននៅថ្ងៃពុធនេះ។
នាវាទេសចរណ៍ ដែលកំពុងស្ថិតនៅដាច់ដោយឡែកពីគេនៅឆ្នេរសមុទ្រជប៉ុន មានអ្នកដំណើរសរុបទាំងអស់ចំនួន ៣.៧០០នាក់។
“ក្នុងចំណោមការធ្វើតេស្តថ្មីចំនួន ៥៣នាក់ មានមនុស្ស ៣៩នាក់ផ្ទុកវីរុស”។ នេះជាការបញ្ជាក់របស់រដ្ឋមន្រ្តីសុខាភិបាលជប៉ុន Katsunobu Kato ថ្លែងប្រាប់អ្នកសារព័ត៌មាន។
សូមបញ្ជាក់ថា នាវាទេសចរណ៍ Diamond Princess ត្រូវបានជប៉ុនដាក់ឲ្យនៅដាច់ដោយឡែក ចាប់តាំងពីធ្វើដំណើរមកដល់សមុទ្រជប៉ុនកាលពីសប្តាហ៍មុន ក្រោយពេលអតីតអ្នកដំណើរម្នាក់ៗដែលបានចុះនៅហុងកុងកាលពីខែមុន ត្រូវបានគេរកឃើញថា មានផ្ទុកវីរុស COVID-19។
អ្នកដំណើរសេសសល់ទាំងអស់ដែលនៅលើកប៉ាល់ ត្រូវបានគេស្នើឲ្យបន្តស្នាក់នៅក្នុងបន្ទប់របស់ពួកគេ ដើម្បីការពារករីករាលដាល។
រហូតមកដល់ពេលនេះ អាជ្ញាធរជប៉ុនបានធ្វើតេស្តរកវីរុសលើអ្នកដំណើរសរុបចំនួន ៤៩២នាក់ ដែលពួកគេភាគច្រើនមានបង្ហាញសញ្ញា ឬអ្នកដែលមានទំនាក់ទំនងជាមួយនឹងអ្នកដែលបានធ្វើតេស្តរួច ហើយមានផ្ទុកវីរុស។
នាវានោះត្រូវគេរំពឹងថានឹងត្រូវនៅដោយឡែករហូតដល់ថ្ងៃទី១៩៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia