ភ្នំពេញ៖ អភិបាលរាជធានីភ្នំពេញ ជំរុញឲ្យអភិបាលខណ្ឌដូនពេញពង្រឹងការថែរក្សាសន្តិសុខ សណ្តាប់ធ្នាប់និងអនាម័យបរិស្ថានឲ្យបានល្អ មិនត្រឹមតែធានាបានសោភ័ណភាពបរិស្ថាន សុខភាពរបស់ប្រជាពលរដ្ឋ។
លោកឃួង ស្រេង អភិបាលរាជធានីភ្នំពេញបានបញ្ជាដល់អភិបាលខណ្ឌដូនពេញ ត្រូវលុបបំបាត់ឲ្យបានរាល់ល្បែងស៊ីសងគ្រប់ប្រភេទ បញ្ហាចោរកម្ម ក្មេងទំនើង សណ្តាប់ធ្នាប់សាធារណៈ បញ្ហាអនាម័យសំរាមជាដើម ដើម្បីឲ្យខណ្ឌនេះនៅតែរក្សាបានភាពស្អាត។
ថ្លែងក្នុងពិធីប្រកាសឲ្យដំណើរការរចនាសម្ព័ន្ធថ្មី នៃរដ្ឋបាលខណ្ឌដូនពេញនៅព្រឹកថ្ងៃទី១២ ខែកុម្ភៈនេះ លោកអភិបាលរាជធានីភ្នំពេញ បានបញ្ជាក់ថា ចាំបាច់ណាស់ខណ្ឌដូនពេញ គឺត្រូវតែល្អស្អាតឲ្យបានជាប់ជាប្រចាំ ព្រោះខណ្ឌនេះជាចំណុចកណ្តាលនៃរាជធានីភ្នំពេញ សម្បូរ ទៅដោយតំបន់ទេសចរណ៍ដែលទាក់ទាញភ្ញៀវទេសចរមកទស្សនាកម្សាន្តជាច្រើន។ អភិបាលខណ្ឌដូនពេញត្រូវចុះពិនិត្យការលក់ដូររបស់ប្រជាពលរដ្ឋនៅលើចិញ្ចើញផ្លូវ សាធារណៈ ដោយមិនត្រឹមតែខូចសណ្តាប់ធ្នាប់ និងរបៀបរៀបរយសាធារណៈប៉ុណ្ណោះទេ ប៉ុន្តែ ពួកគាត់បានបង្កើតជាសំរាមគរាយប៉ាយ ដោយគ្មានទំនួលខុសត្រូវក្រោយពីការលក់ដូររួច។ បន្ថែមពីនេះទៀតត្រូវសន្យាលុបបំបាត់ឲ្យអស់នូវល្បែងកន្ទុយលេខតាមផ្សារ ល្បែងស្ទួចត្រីខុស ច្បាប់ដែលកំពុងមានសកម្មភាពរីកដុះដាលច្រើន។
នៅក្នុងឱកាសនោះដែរ លោកអភិបាលរាជធានីភ្នំពេញ ក៏បានណែនាំដល់អភិបាល ខណ្ឌទំាងអស់ជួយជំរុញឲ្យប្រជាពលរដ្ឋបង់ថ្លៃប្រមូលសំរាមឲ្យបានទៀតទាត់ ដើម្បីបំពេញកាតព្វកិច្ចជាពលរដ្ឋល្អ ក្នុងការចូលរួម ធានាធ្វើឲ្យរាជធានីភ្នំពេញ នៅតែរក្សាបានភាពស្អាតមានផាសុកភាព និងគុណភាពបរិស្ថាន។ លោកបានថ្លែងថា ក្នុងរយៈពេល៨ខែទៀតការ រៀបចំនីតិវិធីក្នុងការគ្រប់គ្រងបញ្ហាសំរាមនេះបានល្អ ទំាងការប្រមូលសំរាម និងការបង់ថ្លៃសេវា ប្រមូលសំរាម ដោយមានក្រុមហ៊ុនត្រឹមច្បាស់លាស់ ក្នុងការអនុវត្តកិច្ចការនេះ។
បញ្ហាការកកស្ទះសំរាម ក្នុងរាជធានីភ្នំពេញ និងត្រូវបានដោះស្រាយក្នុងរយៈពេលប្រាំបីខែខាងមុខនេះ។
លោក ឃួង ស្រេង បានលើកឡើងថា យ៉ាងយូររយៈប្រាំបីខែទៀត បញ្ហាការកកស្ទះសំរាម និងត្រូវបានអនុវត្តទទួលបានជោគជ័យ តាមរយៈការដាក់ចេញរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី បានប្រគល់ភារកិច្ចឲ្យក្រសួងសេដ្ឋកិច្ច និងហិរញ្ញវត្ថុ និងរដ្ឋបាលរាជធានីជាអ្នកអនុវត្តឲ្យបានជោគជ័យ។ លោកបានបញ្ជាក់ឲ្យដឹងទៀត ក្រសួងសេដ្ឋកិច្ចនិងហិរញ្ញវត្ថុ បាននិងកំពុងធ្វើការកែទម្រង់ ទាក់ទងនិងបញ្ហាការប្រមូលសំរាមនេះ ក្នុងនោះបានជំរុញឲ្យប្រជាពលរដ្ឋចូលរួមបង់ថ្លៃសេវាសំរាមផងដែរ ដើម្បីជំរុញក្នុងបង្កើនកម្លាំងផ្តល់សេវាប្រមូលសំរាមកាន់តែច្រើន ដើម្បីទីក្រុងស្អាត សុខុមាលភាពប្រជាពលរដ្ឋទៅថ្ងៃអនាគត។ លោកអភិបាល បានចាត់ទុកបញ្ហាកកស្ទះសំរាម ជាបញ្ហារបស់លោកផ្ទាល់ក្នុងដោះស្រាយ និងក៏ជាបញ្ហារបស់ប្រទេសជាតិទាំងមូលផងដែរ ។
លោក ឃួង ស្រេង បានណែនាំឲ្យថ្នាក់ដឹកនាំខណ្ឌ មន្ត្រីរាជការនៃសាលាខណ្ឌ ដែលទទួលបានភារកិច្ចថ្មីនៅពេលនេះ ក្រោយទទួកបានតួនាទីភារកិច្ចរួច ត្រូវចេះរិះរកគ្រប់វិធីសាស្រ្តក្នុងការអនុវត្តគោលការណ៍ គ្រប់គ្រង ការចាត់ចែង និងការប្រើប្រាស់សិទ្ធិអំណាច និងធនធានរបស់ខ្លួន សម្រាប់ការផ្តល់សេវា និងការអភិវឌ្ឍន៍មូលដ្ឋានឆ្លើយតប ទៅនិងតម្រូវការប្រជាពលរដ្ឋប្រកបដោយប្រសិទ្ធភាព តម្លាភាព គណនេយ្យភាព បរិយាប័ន្ន និងសមធម៌ ឲ្យសមស្របទៅតាមការយកចិត្តទុកដាក់ របស់ប្រមុខរាជរដ្ឋភិបាលកម្ពុជា ដែលបានប្រគល់តួនាទីភារកិច្ចឲ្យនាពេលនេះ ។
អភិបាលនៃអភិបាលរាជធានីភ្នំពេញ លោកឃួង ស្រេង បានធ្វើការណែនាំនិងជំរុញឲ្យអាជ្ញាធរខណ្ឌ សង្កាត់ ប៉ុស្តិ៍ ត្រូវទប់ស្កាត់ឲ្យបាននូវបទល្មើសល្បែងស៊ីសងគ្រប់ប្រភេទ នៅក្នុងមូលដ្ឋាន ពិសេសលោកប្រធានផ្សារនានានៅក្នុងរាជធានីភ្នំពេញ បើបណ្ដោយឲ្យមានល្បែងស៊ីសងនៅក្នុងផ្សារ លោកប្រធានផ្សារនឹងប្រឈមនឹងការដកតំណែងចេញតែម្តង ។
លោកឃួង ស្រេង បានមានប្រសាសន៍ថា ប៉ុស្តិ៍រដ្ឋបាលមិនមែនជាមេរបស់ចៅសង្កាត់នោះទេ តែជាថ្នាក់ក្រោមរបស់ចៅសង្កាត់ ដូច្នេះត្រូវតែស្ដាប់ ការណែនាំពីលោកចៅសង្កាត់ ពិសេសត្រូវទប់ស្កាត់ឲ្យបាននូវបទល្មើសផ្សេងៗ នៅក្នុងមូលដ្ឋានរបស់ខ្លួនពិសេសគឺ បទល្មើសល្បែងស៊ីសងគ្រប់ប្រភេទ ។ ពាក់ព័ន្ធនិងបញ្ហានេះដែរ ប្រធានផ្សារនៅក្នុងរាជធានីភ្នំពេញទាំងអស់ បើសិនជានៅតែបណ្ដែតបណ្ដោយឱ្យមានល្បែងស៊ីសងនៅក្នុងផ្សារ ពិសេសល្បែងកន្ទុយលេខ ប្រធានផ្សារត្រូវប្រឈមនឹងការដកតំណែង ទោះបីជាថ្ងៃសៅរ៍ឬថ្ងៃអាទិត្យក៏ដោយ ក៏លោកស៊ីញ៉េ
ដកតំណែងពីប្រធានផ្សារបានដែរ។
ប៉ុន្តែទោះបីជាយ៉ាងណាក្តី ក្នុងឱកាសនោះដែរ លោកឃួង ស្រេង ក៏បានលើកឡើងពីការកោតសរសើរ ចំពោះអាជ្ញាធរ ក៏ដូចជាមន្ត្រីមានសមត្ថកិច្ចមូលដ្ឋានផងដែរ ដែលបង្ការនិងទប់ស្កាត់បាននូវបទល្មើសផ្សេងៗពិសេស បទល្មើសចោរឆក់នៅតាមដងផ្លូវសាធារណៈ ដែលកាត់បន្ថយបានយ៉ាងច្រើនពីការរិះគន់ពីសំណាក់មជ្ឈដ្ឋាននានា។
លោកឃួង ស្រេង ក៏បានជំរុញឲ្យអាជ្ញាធរមានសមត្ថកិច្ចទាំងអស់ បន្តធ្វើយ៉ាងណាទប់ស្កាត់ឲ្យបាន នូវបទល្មើសទាំងនេះឲ្យកាន់តែល្អបន្ថែមទៀត ដើម្បីឱ្យប្រជាពលរដ្ឋក៏ដូចជាភ្ញៀវជាតិ អន្តរជាតិ ទុកចិត្តមកលើរាជរដ្ឋាភិបាល និងបញ្ជាក់ឲ្យឃើញថារាជធានីភ្នំពេញ មានសន្តិសុខសុវត្ថិភាពល្អ ដើម្បីទាក់ទាញភ្ញៀវជាតិអន្តរជាតិ មកដើរលេងកម្សាន្តក៏ដូចជា មករកស៊ីនៅរាជធានីភ្នំពេញកាន់តែច្រើនឡើង។
សូមបញ្ជាក់ថា រដ្ឋបាលរាជធានីភ្នំពេញ បានប្រកាសបើកទទួលយកថ្លៃប្រមូលសំរាម ពីប្រជាពលរដ្ឋ ចាប់ពីថ្ងៃទី១ ខែកុម្ភៈដល់ថ្ងៃទី១៥ ខែកុម្ភៈ តាមរយៈប្រព័ន្ធទូទាត់អេឡិចត្រូនិច ដើម្បីបង្កលក្ខណៈងាយស្រួលដល់ប្រជាពលរដ្ឋដែលចំណេញពេលវេលា និងកាត់បន្ថយការចំណាយផងដែរ។ ប្រជាពលរដ្ឋដែលត្រូវបង់ថ្លៃសេវាប្រមូលសំរាម នៅក្នុងខែមករានេះ គឺគ្មានការប្រែប្រួលទេ គឺអនុវត្តន៍ តាមតារាងតម្លៃកាលពីខែតុលា ឆ្នាំ២០១៩កន្លងទៅ៕ដោយ៖កូឡាប